Curaçao International Film Festival ta anunsiá orguyosamente ku e pelíkula Listen to the Voices (Guyana Franses, 2024) di Maxime Jean-Baptiste a wòrdu premiá ku e Yellow Robin Award 2025. E obra poderoso i poétiko aki a destaká pa su meskla di dokumental i fikshon, kontando un historia profundamente konmovedor di rekuerdo, komunidat i sanashon.
E hurado a elogiá e pelíkula pa su idioma sinemátiko sensitivo i profundidat emoshonal. Dor di lanta e peso di violensia di pasado sin nunka mustr’é direktamente, Listen to the Voices ta invitá reflekshon i empatia atraves di imágennan, zonido i e ròl sentral di músika kuidadosamente komponé. E ta un obra di koheshon artístiko remarkabel i poder emoshonal.
E Premio Yellow Robin a inkluí un premio cash di 6.500 USD i Listen to the Voice tambe lo wòrdu proyekta na dos festival di sine internashonalmente renombrá: e Morelia International Film Festival ma Mexico i Film by the Sea na Hulanda.
Un menshon spesial a wòrdu otorgá na Lázaro and the Shark (Cuba, 2023) di William Sabourin O’Reilly, ku a risibí un premio kèsh di 1.000 USD. E hurado a destaká su imágen honesto di bida diario formá pa retonan sosial i ekonómiko, i su homenahe sinsero na resiliensia atraves di komunidat i músika.
E kompetensia di Yellow Robin Award a inisiá na 2013 i e aña aki a selebrá su di nuebe edishon. E kompetensia ta enfoká riba promé i di dos pelíkulanan di artistanan di sine emergente di Karibe, Sentro i Sur Amérika, i e diaspora mas amplio.
E hurado di 2025 tabata presidí pa Daniela Michel, direktor fundadó di Morelia International Film Festival, i a inkluí Ailsa Anastatia i Sinuhe Oomen, tur dos figuranan respetá den e sektor di arte i kultura na Kòrsou.
Pa mas informashon, bishitá www.curacaoiff.com
