MCB ta kontentu i orguyoso di anunsiá ku nos Smart Branch na Sambil ta operashonal.
Durante un seremonia kòrtiku i festivo gerensia di MCB akompañá pa gerensia di Sambil i diferente invitado i kolega a hasi apertura ofisial. Sr. Chicu Capriles, huntu ku miembro di gerensia sra. Daniela Cohen-Henriquez, sr. Joao de Andrade -General Manager Retail Branches- i sr. Marlon Josepha -Branch Manager MCB Sambil Branch- a kòrta e sinta pa despues invitadonan pasa i atmirá e brènch state-of-the-art na Sambil ku arkitektura impreshonante di sra. Taisa Clements (SADA) i ilustrashonnan artístiko, úniko i masha bunita di Bagira i Marlies Schoenmakers.
MCB Smart Branch na Sambil ta diseñá pa duna servisio eksepshonal na nos klientenan i tin fasilidat inovativo pa hasi transakshonnan bankario mas efisiente i plasentero. Durante di e seremonia ofisial di apertura a hasi donashon na tres organisashon ku Banko ta atmirá pa nan trabounan bolunatrio i ku ta kontribuí na bienestar di nos komunidat, spesialmente den e area rondó di Sambil. E tres organisashonnan ta: Stichting Daily Meals Curaçao, Fundashon Cuido Infantil Santa Maria i Proyekto Nos Futuro. Kada un a risibí un donashon na balor di NAf. 15.000,-.
Nos koleganan di MCB na Sambil ta dediká i komprometé pa duna servisio di e nivel mas haltu. Den e brènch tin tambe un ofisina di seguro – MCIS i Bsure, pa fasilitá klientenan pa apliká i regla diferente tipo di seguro òf simplemente haña tur informashon deseá.
MCB Brènch na Sambil ta habrí di djaluna pa djabièrnè di 9’or di mainta pa 3’or di mèrdia. Ta ofresé un variashon di servisio bankario, inkluso 2 Bankomatiko (ATMs), unu paden di e mall i unu pafó ku posibilidat di hasi depósito personal. Ademas, e brènch ta usa un sistema di number modèrno, kaminda klientenan ta tuma un number p’e servisio ku nan ta deseá i warda trankil den un ambiente komfortabel i artístiko, pues no tin nodi di para den rei.
Ademas e brènch ta ofresé nos servisio di depósito 24/7 pa nos klientenan di negoshi.
MCB ta gradisí tur esnan ku di un òf otro forma a kontribuí na realisashon di e proyekto aki.
Maduro & Curiel’s Bank ta kontentu di por kontinuá ku nos trayekto di inovashon i ekselensia, semper poniendo nos klientenan na promé lugá.
Nos koleganan profeshonal i amabel ta yama’bo BON BINÍ na MCB Sambil Branch i t’ei pa sirbi’bo ku plaser. Pasa hasi nos un bishita!
E potrètnan ta papia pa nan mes.
