Den kuadro di su partisipashon na e sertamen Miss Teen Universal 2025, Marina de Vreugd ta enkabesá un tremendo proyekto “Courageous Smiles”, ta trata di trese atenshon nesesario pa hóbennan na Curaçao ku ta wòrdu afektá pa ku e malesa di kanser, sea ku nan mes ta pashènt òf si nan ta ruman òf yu ku ta wòrdu impaktá pa ku e bataya di un ser kerí kontra di e enfermedat. Tambe nos kier honra e hoben sobreviviente ku ta inspirá speransa i forsa, selebrando nan kurashi i resilensia komo inspirashon pa esnan ku ainda ta luchando i nan famia.
Kanser, ounke ku e ta rekonosí komo un problema di salú grandi den nos komunidat, hopi biaha no tin e enfoke sufisiente riba e parti di sosten emoshonal pa ku e hoben i su famia, lagando un falta signifikante den rekurso pa ku esaki. Esaki ta krea un falta den e posibilidat pa duna informashon i sosten na e hubentut ku ta enfrentá ku tur reto emoshonal i sosial ku e situashon ta trese kuné. Na Curaçao, kampaña di salú ta enfoká hopi biaha riba malesanan mas popular manera diabetes, malesa di kurason, i kanser general. Pero, e luchanan spesífiko ku hobennan ta pasa ora kanser ta parti di nan bida, no ta haña atenshon sufisiente.
Esaki ta limitá e komprenshon di komunidat i laga hopi famia sinti nan isolá sin e sosten sufisiente. Hopi hoben ta sinti e efekto profundo ku kanser tin riba nan ser kerí, sin sa ku nan por aserka instansia(nan) pa buska e sosten emoshonal pa enfrenta e situashon.
E meta di Courageous Smiles ta pa yuda kontribui na trese mas konsientisashon tokante e impakto multifasétiko di kanser riba mucha.
Dor di yega na e komunidat pa medio di programa edukativo, i evento di fundraising, nos ke desaroyá un ret di sosten ku ta fortalesé hóbennan ku ta afekta pa kanser.
E proyekto lo kolaborá ku organisashonnan lokal di salú, instansianan karitativo, empresanan den e komunidat pa por ofresé yudansa práktiko pa e parti di sosten emoshonal pa hóbennan ku ta batayando i tambe e hóbennan ku ta enfrentá e doló di un ser kerí ku ta pashènt di kanser, i tambe organisá programa edukativo públiko ku ta stimulá mas komprenshon den komunidat.
Promoviendo e temanan aki, Courageous Smiles ke pone e efecto di kanser bou di hóbennan komo un kousa ku ta mas rekonosí i sostení riba nos isla, segurando ku niun mucha na Curaçao ta enfrentá e efektonan di kanser nan so i ku nan sa ku tin instansia(nan) ku nan por aserka pa yudansa.
Konsientisando komunidat, Courageous Smiles ke logra kambio duradero, sigurando ku tur mucha ku ta afektá pa kanser por sinti nan stimá, komprendí, i empoderá pa enfrentá nan reto spesial.
