E di dos edishon di ‘Global Money Week’ na Kòrsou tabata un éksito total i a konta ku partisipashon di mas ku 950 studiante di skolnan sekundario. Global Money Week a tuma lugá di 17 pa 20 di mart último. Durante e siman a pone atenshon na e importansia di desaroyá konosementu finansiero bou di nos hóbennan. Pichiri – Sabí ku sèn (e inisiativa lokal ku ta e organisadó di Global Money Week Curaçao), a duna huntu ku otro boluntarionan nan un total di 32 Seshon di Plaka na diferente skol sekundario. ‘Skol di Plaka Sessions’ ta un workshop na papiamentu òf hulandes, kompletamente grátis, pa alumnonan di ‘bovenbouw’ di skolnan sekundario.
Pichiri – Sabí ku sèn ta mira bèk na un siman sumamente poderoso, kaminda nos hóbennan pero tambe dosentenan por a siña mas tokante e maneho di nan sèn, haña teps finansiero i interkambiá ku otro riba e tópiko di sèn i edukashon finansiero. Algu ku a bini dilanti na vários okashon ta e imporansia di papia tokante sèn na kas ku mayornan, pero tambe dosentenan ku e alumnonan. Hopi biaha nos hóbennan ta kuminsá dil ku sèn for di un edat yòn, sea pasó nan ta kue djòp òf risibí un sèn mensual, pero no ta tur ora nan sa kon pa atendé sabí ku sèn.
Un danki na tur skol ku a forma parti di Global Money Week 2025 na Kòrsou: St Paulus AGO, Maris Stella SBO, Nilda Pinto SBO, Maris Stella VSBO, University of Curaçao, Radulphus College, Frater Aurelio SBO, Gouverneur J.R. Lauffer, Joseph Civilis VSBO, VSBO St. Jozef, SKAIH Pre-University, Dr. Albert Schweitzer College Parera.
Tambe un danki inmenso na nos boluntarionan ku a duna e ‘Skol di Plaka Sessions’ na tur e skolnan partisipante.
E tim di Pichiri – Sabí ku sèn ta komprometé i klá pa organisá e di tres edishon di Global Money Week otro aña na Kòrsou. Keda pendiente pa mas informashon tokante Global Money Week 2026 pero tambe kon otro nos kada un por yuda amplia e konosementu i edukashon finansiero aki na Kòrsou.
Pichiri – Sabí ku sèn: nos ta traha muchu duru pa nos ta bashí! www.pichiri.cw
