Atlanta – Pareha Real ta ku bishita di trabou na Merka liderando un mishon komersial for di Hulanda i a invitá nos Minister di Desaroyo Ekonómiko, Ruisandro Cijntje pa kompañá nan. E bishita ta konsentrá na Atlanta i Savannah, na e estado di Georgia i despues ta kontinuá pa Albany i New York City.
Estado di Georgia ta den e tòp 10 di merkadonan importante di eksportashon i invershon Hulandes. Tin alrededor di 65 empresa Hulandes establesé na Georgia, bon pa 30 mil kupo di trabou i 35 empresa di Georgia na Hulanda. En total tin mas di 90 mil hende di desendensia Hulandes radiká na Georgia. Den e kuadro aki, Hulanda a organisá e bishita aki pa mustra kompromiso, ofresé apoyo i forga mas negoshi pa su empresanan. E sektornan representá den e mishon Hulandes aki ta sektornan di logístika, finansiero, kreativo i teknologia.
Meta di Kòrsou su partisipashon
Relashonnan eksterior di Hulanda a ekstendé un invitashon na Minister Cijntje pa djòin e mishon aki. Aparte di su interesnan komersial, Hulanda ta buska tambe konekshonnan ku e komunidat afro amerikano ku tin un historia komun ku e partinan di Reino den Karibe riba área di herensia, emansipashon, reparashon i igualdat. Pa medio di un desaroyo integral, siudat di Atlanta ta trahando pa alsa nivel di bida di e siudadanonan afro amerikano ku tin un tendensia di keda atras. Minister Cijntje a mira un bon oportunidat pa posishoná Kòrsou na Atlanta i Savannah i krea e kontaktonan pa nos por sigui profundisá e relashonnan. Riba tereno di deporte i turismo nos tin hopi bon relashon kaba mirando nos peloteronan ku ta move na Atlanta den Baseball i tambe e echo ku nos tin buelonan direkto ku Delta Airlines. Pero tin hopi posibilidat di negoshi i tambe edukashon. Sektor kreativo, empresanan chikí i entrepreneurship, desaroyo sosio ekonómiko i kultural ta áreanan fuerte pa desaroyo ku Atlanta. Banda di esei, tin oportunidat pa nos yunan di tera buska edukashon avansá na universidatnan manera Georgia tech, SCAD i hopi mas. Minister Cijntje a topa tambe ku diáspora di Kòrsou ku ta biba na Atlanta i lo traha riba un database di nos hendenan na Georgia pa mantené kontakto ku nan i inkluí nan den e relashonnan ku Georgia i e desaroyonan na Kòrsou.
“I have a dream”
E bishita na Atlanta a start ku un bishita na Martin Luther King, Jr. Center For Nonviolent Social Change (The King Center), kaminda e delegashon a haña un rekorido na e museo ku tin e kolekshon di mas amplio di e legado di Martin Luther King jr. The King Center a keda lantá na 1968 pa e kasá di Dr. King i ta promové e aktivismo di Dr. Martin Luther King jr. pa no violensha, igualdat i libertat manera ela prediká den su spich famoso na 1963 ku te awe ainda ta keda referí na dje, “I have a dream”. E yu muhé di Dr. Martin Luther King jr. , Bernice King, a guia e delegashon den e museo i a interkambiá ampliamente riba posibilidatnan di koperashon. El a referí na e echo ku Rei a pidi despensa pa e historia di komersio di esklabo i esei ta un señal positivo. Na final di e rekorido, Pareha Real a pone un krans na honor di e restunan di Dr. Martin Luther King jr.i su kasá na nòmber di Reino. Pegá ku e museo ta situá Ebenezer Baptist Church, kaminda Martin Luther King tabata prediká, i ku ta e mekka di aktivismo pa igualdat i einan Pareha Real a interkambiá ku hóbennan di e komunidat i a skucha kiko tur nan ta hasiendo pa mantené e soño di Dr. Martin Luther King na bida. Djei e delegashon a bai topa ku alkalde di Atlanta, Andre Dickens, i a haña un rekorido na Beltline, un área di rekreo den Atlanta ku a kambia struktura di e siudat despues di a transformá un ring di trein den un área di enkuentro, rekreo, dibershon, deporte i bibienda. Beltline ta un proyekto di impakto grandi i Hulanda a hunga un ròl importante den yuda krea e kondishonnan i rehabilitashon di Beltline.
E highlight di e dia, tabata na momentu ku Pareha Real huntu ku Minister Cijntje a bishitá Patchwerk, un di e studionan di grabashon di mas importante den e mundu di músika Hiphop. Pa esaki, dos artista grandi di músika na Hulanda Rotjoch i Frenny a biaha bini Atlanta. Na e momentu di e bishita, e artista yu di Kòrsou Smurv tabata presente pa graba den studio i tabata un momentu great pa mira kon pareha real a yuda “produsí” un beat i asina forga un kolaborashon entre Frenny, Rotjoch, Smurv i algun músiko di Merka. Tabatin un interkambio interesante entre pareha real, Minister Cijntje i e músikonan durante kua nan a ekspresá e sintimentunan tras di nan ekspreshon musikal, e falta di edukashon musikal i e ròl ku teknologia ta hunga den distribushon di músika.
Minister Cijntje a presensiá tambe apertura di NewCold, un invershon di un kompania di Hulanda di aproksimadamente 300 mion Dolar ku ta un sentro di logístika pa distribushon di produktonan kongelá i friu i e ta altamente outomatisá.
Djamars mainta tempran, Minister Cijntje a biaha huntu ku Pareha Real pa Savannah Georgia den avion di Gobièrnu Hulandes. Na e okashon aki, Rei Willem Alexander tabata Ko-Piloto. Na Savannah tabatin un enkuentro ku Alkalde Van Johnson ku a mustra interes pa profundisá relashonnan ku Kòrsou. Despues Minister a bishitá Georgia State University i finalisá su bishita na Savannah na Georgia Ports, e haf di mas grandi den nos hemisferio ku ta e punto di entrada pa importashon na Merka i e punto prinsipal di eksportashon for di Merka. Georgia Ports ta konosí pa su efisiensia i a duna di konosé di ta habrí pa interkambio di konosementu ku haf di Kòrsou.
