Minister Charles Cooper di Ministerio di Tráfiko, Transporte i Planifikashon Urbano (VVRP), huntu ku e Servisio pa Planifikashon Urbano (ROP) a entregá resientemente e pèrmit ofisial di konstrukshon pa e ambisioso proyekto “Tera Adora”. E eco-resort di nivel haltu aki lo keda desaroyá rondó di playa Cas Abou i ta representá un momentu importante den desaroyo sostenibel na Kòrsou.
E proyekto ta konta ku un resort ku 120 kamber riba e seru na parti zuit (Hotelheuvel) i 50 villa eksklusivo na e seru parti nort (Villaheuvel), riba un total di 33 hèktare. Lo tin restorant ku ta aksesibel for di laman kaminda tur hende lo por sinta, kome i disfrutá di e bista. Un futuro “skybridge” espektakular lo konektá e resort, e villa i e playa den un solo ‘masterplan’.
Un parti importante di e desaroyo ta e reorganisashon integral di playa Cas Abou, ku ta keda públiko i ta propiedat di APC. Lo tin un zona komersial nobo ku restorant, tienda i un ‘parkerplaats’ nobo pa yega e kapasidat nesesario pa pueblo di Korsou, bishitante, huespet i doñonan di e villanan. Esaki ta un trayekto di APC.
Loke ta hasi “Tera Adora” diferente for di otro proyekto ta su enfoke total riba sostenibilidat. E resort lo ta energétikamente neutral i outosufisiente, ku uzo di energia solar, sistema pa purifiká awa i teknologia di konstrukshon moderno pa ventilashon natural i friu efisiente. Awa di awaseru i awa normal (grijswater) lo wòrdú re-usá den e área, kual lo duna un impulso bèrdè na e tereno. Tambe lo tene kuenta ku balornan kultural históriko.
E invershon total pa e proyekto ta mas ku 140 mion dólar merikano, dividí entre e parti di hotèl i di villa. E operador di hotèl – un nòmber internashonalmente renombrá – lo wòrdú anunsiá pronto.
Minister Cooper a pone énfasis riba e importansia di un desaroyo sostenibel:
“Tera Adora ta un ehèmpel kla di kon turismo por krese den harmonia ku naturalesa, balornan kultural, inovashon i un kontribushon ekonómiko pa nos komunidat.”
Ku e entregamentu di e pèrmit di konstrukshon, e promé paso ofisial a wòrdú tumá pa realisá un resort ku lo pone Kòrsou riba mapa internashonal komo un destinashonal sostenibel i eksklusivo.
