Minister Charles Cooper di Tráfiko, Transporte i Planifikashon Urbano a tuma un paso importante pa sigui mehorá iluminashon públiko na Kòrsou. Minister Cooper huntu Aqualectra a firma un Service-Level Agreement (SLA) nobo pa e periodo 2025–2027. E akuerdo aki ta garantisá mantenshon struktural di e lusnan di kaya riba nos isla.
E SLA aki ta pèrmití Aqualectra tuma responsabilidat pa mantenshon kompletu di e lusnan di kaya durante tres aña. E akuerdo ta inkluí reparashon di lusnan kibra, mantenshon preventivo, i un sistema pa detektá i solushoná fayo na manera mas efisiente. E akuerdo ta enserá ku sobra lusnan tambe lo wòrdú kambiá pa LED. Na e momentu aki, tin 14 mil lus kambiá kaba i falta 16 mil mas ku lo wòrdú kambiá den e próksimo 2 pa 3 aña.
Un tim di eksperto di e tantu e ministerio komo Aqualectra a hasi un tremendo trabou pa negoshá i traha e SLA aki.
Minister Cooper a enfatisá importansia di un bon funshonamentu di iluminashon públiko pa seguridat den tráfiko, bienestar di komunidat, i sentido di seguridat. “Un kaya ku bon iluminsashon ta kontribuí na un Kòrsou mas sigur, tantu pa e hende ku ta usa e kaminda komo pa e bario. E akuerdo aki ta reflehá nos kompromiso pa infrastruktura duradero i konfiabel pa tur esun riba e isla,” segun minister Cooper.
E kolaborashon ku Aqualectra no ta nobo, pero ku e SLA nobo aki e nivel di servisio lo subi, ku klaridat den e akuerdo tokante tempu di reakshon, standartnan di kalidat i obligashon di raportá.
Minister Cooper i Aqualectra ta pidi komunidat pa sigui hasi uso di e puntonan di kontakto disponibel pa raportá lusnan kibra, pa e mantenshon por tuma lugá di forma efisiente i enfoká.
