Minister di Hustisia, mr. Shalten Hato, ta sigui intensifiká esfuerso pa mehorá seguridat den nos komunidat. Den e kuadro akí, minister Hato huntu ku Kuerpo Polisial Kòrsou a risibí djamars 20 di Mei 2025 un presentashon durante oranan di mainta tokante un sistema nobo i modèrno di kamara di seguridat. E kamaranan akí lo sirbí pa monitorea i duna asistensia den diferente área, inkluso prevenshon i kontrol di infrakshonnan den tráfiko.
E sistema nobo ta inkluí kamaranan digital ku kapasidat pa identifiká i dokumentá situashonnan komo aksidente di tráfiko, akto di kriminalidat manera ladronisia, aglomerashon ilegal, i otro tipo di desórden públiko. E teknologia ta avansá i adaptá pa e nesesidat di nos isla, ku un enfoke spesífiko riba seguridat i loke ta sosodé riba nos kareteranan.
Minister Hato a enfatisá ku pa hopi tempu, a inisiá den vários trayekto un plan struktural pa modernisá i amplia e kapasidat teknológiko di seguridat na Kòrsou. “Nos mester invertí den teknologia pa protehá nos bario, nos hendenan i nos futuro,” segun e minister.
Un total di 50 kamara ta partí di e fase inisial di e proyekto akí. E kamaranan lo ser instalá na diferente punto stratégiko riba e isla, ku un énfasis riba áreanan di tráfiko hopi drùk i lugánan ku hopi bes ta skohé pa praktiká nan ílisito tuma lugá. For di e informashon kolektá di e kamara nan aki, por tuma medidanan preventivo mas efisiente i e polis por aktuá mas lihé riba situashonnan di emergensia òf hasi detenshon di esnan kulpabel di kualke akto kriminal.
Minister Hato ta enfatisá ku e direkshon ku Ministerio di Hustisia ta bai ta pa paso firme riba kaminda pa garantisá seguridat i pas den nos komunidat. “Seguridat no ta un luho, ta un derechi. Nos ta traha dia tras dia pa krea un Kòrsou mas sigur i seif pa tur hende.”
