Ministerio di SOAW i Nibud (Nationaal Instituut voor Budgetvoorlichting) a lansa un inisiativa konhunto pa fortalesé bienestar finansiero di habitantenan di Kòrsou. E akuerdo entre Nibud i SOAW ta enserá ku huntu ta traha riba redukshon di strès finansiero i problemanan di sèn na Kòrsou, dor di entre otro traha riba prevenshon di debe, edukashon finansiero i kampaña di formashon. Realisashon di e korant aki ta un di e logronan importante den e kooperashon entre SOAW i Nibud.
Minister di SOAW, Sra. mr Dayanara Chin-A-Lien-Roozendal, ta aploudí e inisiativa aki i ta enkurashá tur hende pa lesa e korant i pone e kontenido den práktika. Tambe e ta yama danki na tur instansia i persona ku a aportá na realisashon di e korant.
Segun Jurenne Hooi di e Komishon Maneho di sèn, e korant ta ofresé entre otro konseho práktiko, informashon tokante rekursonan lokal i strategianan pa manehá presupuesto. “E meta ta pa stimula bienestar finansiero di nos poblashon”.
E korant ta optenibel riba medionan sosial, manera e página di Facebook di SOAW, na e diferente Sektor i Kas di Bario di SOAW i más despues na kamber di espera di diferente dòkter etc.
