Minister di Asuntunan General enkargá tambe ku agrikultura señor Gilmar Pisas resientemente a hasi un rekorido i bishitá diferente agrikultor i kriadó di bestia. Esaki den kuadro di su maneho pa stimulá i sostené nos propio produktornan di kuminda paso kada unu ta kontribuí den e proseso importante kual ta seguridat alimentisio di nos pais.
Primeramente Minister Pisas a bishitá señor Vieria ku tin un plantashon bastante grandi parti pariba di nos isla kaminda e ta produsí entre otro; papaya, banana i pampuna. Despues a bishitá señor Janga ku ta un hóben kriadó di galiña di forma biológiko. E ta importá puitu pa despues di 2 luna ku nan bira galiña grandi, bende esakinan riba nos merkado. Un di e puntonan di atenshon ku señor Janga a trsese dilanti ta e echo ku no ta sakrifiká galiña na nos abatuar. Ku esaki bira posibel e ta fasilitá e proseso di sakrifiká galiña pa despues trese esaki riba nos merkado ku aprobashon di nos servisio veterinario.
Minister Pisas a bishitá tambe CurHydro ku ta produsí bèrdura konforme e metodo moderno di hydroponics. CurHydro ta importá simia i konsekuentemente ku tiki awa i di forma orgániko ta produsí; tomati, crystal salad i komkomber. Ku e metodo di hydroponics aki ta posibel produsí mayoria di e bèrduranan ku nos ta importá. Despues e rekorido a sigui pa Angel’s Farm. Aki señor Angel a splika ku e ta kria galiña di forma biológiko ku e meta pa produsí webu pa merkado lokal. Por a mira ku e galiñanan ta kana liber sin e strès di ta sera den un kouchi chikitu i esaki ta pone ku e webunan ta di mihó kalidat.
Por último a bishitá Rancho Alegre kaminda ta kria kabritu di e rasa Boer Goat ku e meta pa drecha rasa di kabritu aki na Kòrsou. Señor Pinedoe di Rancho Alegre a mustra ku mester bini insentivonan pa por sakrifiká mas animal aki na Kòrsou mes. Di e forma aki mester importá menos pues saka menos divisa for di nos pais.
Na final Minister Pisas a mustra di a haña hopi splikashon di agrikultornan i ku nos sektor di agrikultura tin hopi potenshal, pero mester di mas sostén di gobièrnu. Minister a keda impreshoná tambe di e sistema di produsí hasiendo uzo di teknologia di hydroponics. Nos mester sigui traha pa insentivá krio di bestia i agrikultura. Mester pone mas fondo disponibel i akshon pa nos alkansá e meta di seguridat alimentisio pa nos pais.
