Minister di Asuntunan General enkarga alabes ku sektor di Agrikultura, Medio Ambiente i Naturalesa señor Gilmar Pik Pisas, novèmber aña pasá a duna enkargo pa inisia e proyekto di FAD’s kaminda eksperto señor Watt di Antigua i señor Megas di Guadaloupe a kompartí nan konosementu di traha FAD’s ku nos piskadónan i kolaboradónan di Carmabi. Den futuro no ta nesesario pa manda buska eksperto for di afó mas mirando ku nos hendenan lokal mes tin e ekspertisio aki awor. E FAD’s nan a keda elaborá i awor a yega e fase di baha e buinan na laman. FAD ta “Fish Aggregating Devices”, kual ta un struktura di bui i kabuya den laman ku ta atraé piská.
Ministerio di GMN a baha 5 di e buinan aki pa atraé piská na diferente sitio den nos awanan. E lokalidatnan kaminda a baha e buinan ta; unu na Punta Abou na Westpunt 12°22’960’’ N, 69°11’138’’ W na un profundidat di 2937 pia, unu na altura di Kenepa 12°21’073’’ N, 69°10’940’’ W na un profundidat di 3000 pia, na Sta. Cruz 12°17’811’’ N, 69°10’610’’ W na un profundidat di 3000 pia, na Boca Samí 12°07’794’’ N, 69°01’301’’ W na un profundidat di 2480 pia i na sùit di Klein Kòrsou 11°56’379’’ N, 69°42’322’’ W na un profundidat di 3100 pia. Minister Pisas tabata presente riba e barku pa personalmente tuma nota di e trabounan i yuda baha e buinan den laman.
Minister Pisas ta enfatisá ku mester mantené kupo di trabou den piskamentu tradishonal alabes oumentá peska i entrada di piskadónan di Kòrsou. Komo ku den serkania di un FAD semper por enkontrá kantidat grandi di piská, piskamentu ta bira muchu mas fásil pa un piskadó pasobra e sa unda e mester bai pa haña piská. Uniko kondishon ta ku no por mara boto na e bui. E benefisionan ta entre otro; ménos gastu di kombustibel i ménos tempu pa enkontrá piská. Tur esaki ta benefisioso pa entradanan di piskadónan i ta sòru pa e trabou di piskadó keda atraktivo.
