Djabièrnè, 10 di yanüari 2025, minister Shalten Hato ku sumo plaser a inougurá un otro huki spesial pa muchanan ku ta kompañá nan mayor e bia aki na Vergunningenloket ( Lokèt di Pèrmit).
Esaki ta e di 4 huki ku a keda yamá “Gobièrnitu”. Meta di e huki aki ta pa e muchanan por sinti nan mes na kas den departamentonan di Gobièrnu.
Ku esaki Ministerio di Gobernashon, Planifikashon i Servisio Públiko ta introdusí un otro espasio spesial pa muchanan pasa tempu ora nan bai e departamento di gobièrnu. Den e kaso aki Lokèt di Pèrmit. Aki nan por entretené nan mes miéntras nan mayor ta keda yudá na bali. E Intenshon ta pa sigui introdusí “Gobièrnitu” na mas servisio i departamentonan di gobièrnu, pa asina e mucha por kuminsá kustumbrá for di un edat chikí ku e departamentonan di gobièrnu, ku ta di sumo importansia den kada un di nos bida. Minister Shalten Hato ta hopi kontentu ku e inovashon aki, ku ta trese mas trankilidat ora un persona tin ku bai na ofisinanan di gobièrnu i tin un huki spesial pa mucha por entreten’é nan mes.
