E Ministerio di Desaroyo Sosial, Labor i Bienestar (SOAW) di Kòrsou, bou di liderato di Minister Ruthmilda Larmonie-Cecilia, a hasi un bishita importante di un dia na Aruba. E bishita aki tabata ku e meta di interkambio di konosementu i eksplorashon di e maneho sosial i desaroyonan relevante, ku ta krusial pa e futuro i koperashon di e islanan. E delegashon di Kòrsou a risibí un bon biní di nan koleganan Arubano, Minister di Hustisia i Asuntu Sosial Rocco Tjon i Minister-Presidente Evelyn Wever-Croes.
E bishita tabata enfoká riba fasilitá e interkambio di informashon i e akumulashon di konosementu tokante di ‘best practices’ den e área di bienestar sosial i kon por apliká esakinan mas prátiko riba e dos islanan. E programa di e dia yen aki a kuminsá ku un reunion produktivo kaminda nan a diskutí riba e desafionan mutuo den e area di e sistema sosial, bienestar i Labor. Nan a kompartí konosimentu i a buska solushonnan huntu.
Despues di e reunion, e delegashon a bishitá Fundashon Pa Nos Comunidad, e organisashon di voedselbank ofisial di Aruba ku ta duna sosten pa 150-200 famianan pa luna. E bishita aki a duna konosimentu balioso tokante di varios manera ku e fundashon por duna sosten pa e komunidat i kon e fundashon a haña un base fuerte for di e sektor empresarial.
E tim segidamente a bishitá CEDE Aruba, e sentro nashonal pa desaroyo sosial. CEDE ta duna finansiero pa projektonan di komunidat den e área sosial ku enfoke riba projektonan for di bario i komunidat. CEDE ta funshoná komo e organisashon ku ta realisá i ta traha huntu ku e gobièrnu Arubano i SFC. E struktura di CEDE komo organisashon, e envolvimentu di e komunidat i e kantidat di inisiativanan den e area di desaroyo sosial a laga un fuerte impreshon riba e delegashon di Kòrsou.
Un parti krusial di e bishita, tabata un bishita na SVB Aruba. Ku e kuestion aktuál na Kòrsou tokante di e problemátika di AOV i e revishon di e sistema sosial, e konosimentu ku a risibí na SVB Aruba tabata di gran balor. E último organisashon ku a wòrdu bishitá tabata Famia Planea. E organisashon aki ta duna sosten i informashon tokante di salú seksual i planiamentu familiar. Famia Planea ta hasi uso efisiente di digitalisashon, ku ta yuda nan yega nan grupo di meta. E manera inovativo aki a impreshoná e delegashon di Kòrsou. Final, e dia a sera ku un diner huntu ku e delegashon kompletu di Kòrsou i Aruba.
Minister Larmonie-Cecilia a enfatisá e importansia di e bishita aki, na momentu ku el a bisa: “E bishita informativo aki tabata di gran balor. E konosementu i ideanan ku nos a risibí, sin duda lo apoyá nos esfuersonan pa mehorá e bienestar sosial na Kòrsou. Nos ta wak dilanti pa implementá e konosementunan den e maneho sosial di Kòrsou i pa mehorá e bienestar sosial na nos isla.”
E bishita na Aruba tabata un paso importante pa fortalesé e laso i pa mehorá e koperashon entre e dos islanan. E Ministerio di SOAW na Kòrsou ta komprometé nan mes pa apliká e ideanan balioso ku nan a siña pa mehorá e panoráma di sosial i labor na Kòrsou i pa garantisá un futuro sostenibel i próspero pa e komunidat.
