Ministerio di Enseñansa, Siensia, Kultura i Deporte (ESKD) a lansá un módulo di personal renobá den e aplikashon di Enseñansa “Centraal Landelijke Onderwijsapplicatie” (CLOA). E módulo di personal aki ta un paso importante den e trayekto di digitalisashon den e tereno edukativo i ta reforsá tantu e forsa di maneho komo e efisiensia atministrativo di e ministerio i e institushonnan edukativo.
Ku datonan di personal atministrá di forma sentral, e datonan ta aktualsá i mas konfiabel. Ministerio di ESKD i e direktiva di skolnan ta haña mas kòntròl riba e maneho stratégiko di personal. Esaki ta permití pa hasi eskoho di personal di forma mas fundamental pa tantu e parti di kontrakt, empleo i e desaroyo di personal. E módulo di personal ta forma un fundeshi sólido i firme pa finansiamentu di enseñansa di un forma transparente i hustu. Pero tambe e módulo ta adaptá, na e nesesidatnan real riba e tereno di enseñansa.
Na mes momento, e módulo ta minimalisá e trabounan atministrativo ku tabata sosodé di forma manual. E módulo ta registrá informashon for di komienso di e personal den funshon (ora kuminsá traha) te ku kambio di funshon. Tur kambio ta keda prosesá di forma digital i sigur, pa asina evitá erornan òf duplikashon den e registro. E módulo aki ta krea espasio den sektor di enseñansa pa traha riba loke ta realmente importante, Enseñansa di Kalidat.
E módulo nobo ta fásil pa uza i e ta desaroyá pa ta konektá ku loke ta sosodé den práktika. Esaki a keda di di test pa profeshonalnan den enseñansa, promé ku e módulo a bai den funshon.
Den un siguiente fase, ta konektá e módulo di personal ku entre otro AFAS pa asina sinkronisashon di datonan por sosodé di forma outomátiko. Esaki ta habri porta pa baha e preshon for di e skolnan pa reportá, komo awor ku a introdusí e módulo nan tin e informashon nesesario disponibel di forma digital i aktual (Real Time).
