Dia 27 di yüli 2024, Kòrsou a skirbí historia ku e promé kasamentu sívil entre un pareha LGBT. Eksaktamente dos siman despues di e sentensia revolusionario di Korte Supremo na Den Haag, e pareha lebiana Danika i Melinda a bisa “sí” na otro, markando un logro ku ta resultado di dékada di lucha pa derechi igual. Rondoná di famia, amigu i kolega nan a selebrá e dia históriko aki.
Promé, e tabata imposibel pa nan, manera hopi otro pareha, pa ofisialmente konsagrá nan amor. E tabata manera nan relashon no tabata totalmentre rekonosí. Pero danki na e lucha legal ku Human Rights Caribbean (HRC) a hiba durante kuater aña, nan a por finalmente eksperenshá e momentu ku nan tabata sperando pa tanto tempu.
“Esaki ta un viktoria pa amor, igualdad i hustisia,” segun presidente di HRC, Janice Tjon Sien Kie. “Esaki ta un paso importante pa dilanti pa nos komunidat i un señal pa resto di mundu ku amor no tin limitashon.”
E seremonia tabata un evento íntimo i emoshonante. E yunan di e pareha a fungi komo testigu, un akto simbóliko ku ta enfatisá e union di e famia. Nan ñieta a hiba e renchi di kasamentu, un
momentu ku a toka tur ku tabata presente profundamente. Ademas, e koperashon risibi di parti nos Registro Sivil (Kranchi) hunto ku nos óutoridatnan di Kuerpo Polisial ta di aplóudi.
E organisashon di e boda históriko aki a bai sin ningun problema. Pero tambe den e preparashon, e departamentu di Asuntunan Públiko a traha profeshonal. Asina e sistema pa registrá parehanan di mesun sekso a kuminsa traha inmediato i riba e dia mes e Ofisial di Registro Sivil Nersicio a papia di kurason, i supraya e mensaje universal ku ‘amor ta amor’.
Despues di e seremonia íntimo na registro sívil, e fiesta a sigui na Landhuis Kranshi, un lugá históriko kaminda e promé konferensia LGBT Karibeño a tuma luga na 1998. E minister di Koperashon pa Desaroyo (Ontwikkelingssamenwerking) Edith Strauss-Marsera a habri e konferensha e aña ei. Den mesun temporada, defuntu obispu Wim Ellis a defende derechi igual pa komunidat LGBT i a enkurashá nan pa sigui planta rosa den desierto. Además, e eskoho di e lugá aki ta di importansia partikular pasobra e edifisio ta e promé buró di registro sívil di Kòrsou. Selebrá e promé kasamentu sívil entre pareha di mesun sekso na e lugá aki ta pre destiná.
Ku e kasamentu aki, Kòrsou ta pone un ehempel den Karibe pa e derechi di e komunidat LGBT. Desde e sentensia revolusionario di Korte Supremo, por lo menos ocho pareha LGBT a bai den ondertrouw.
“Esaki ta un viktoria pa tur hende ku a lucha pa igualdat,” segun Tjon Sien Kie di HRC. “Esaki ta un señal ku nos ta na kaminda korekto.”
Dia 12 di yüli Korte Supremo na Den Haag a konfirmá e sentensia di apelashon. E sentensia aki ta rekonosé ku e definishon di kasamentu den kódigo sívil ta kontra e prohibishon di diskriminashon di e Konstitushon di Aruba i Kòrsou. E tribunal a konkludí ku no tin ningun hustifikashon pa ekskluí pareha di mesun sekso for di kasamentu. Gobiernu di Aruba i Kòrsou a bai den apelashon kontra e desishon, pero Korte Supremo a sostené e veredikto. Komo resultado, ku pareha di mesun sekso por kasa inmediatemente, sin e nesesidat di un kambio di lei.
Tjon Sien Kie: “Ku e kasamentu aki, un pagina nobo den historia di Kòrsou a wordu skibí. HRC ta sumamente orguyoso ku a kontribuí na e momentu históriko aki. Masha pabien na Dánika i Melinda. Mi ta deseá nan un bida largu i felis. Nan ta sirbi komo inspirashon pa futuro generashon. Laga nos sigui lucha huntu pa un mundu kaminda tur hende ta igual i amor semper ta gana.”
Na final HRC ta wak ku satisfecho bèk riba e koperashon ku Igualdat Kòrsou. “E esfuerso di e kolektivo a yuda pa nos por disfruta di e mesun derechi ku parehanan hetero tin. Mi ke gradisí tur hende ku ta forma parti di Igualdat pa e lucha ku nos a hiba pa dies aña largu i ku awor nos por kosecha e bon resultado.”
