Stichting Monumentenzorg Curaçao a kuminsá ku e fase final di e restourashon di ‘Huize Sebastopol’ pa su funshon nobo komo Museo di Músika i sentro di entretenimientu multifunshonal. Entre 2019-2020 e edifisio monumental na Otrobanda a pasa den un restourashon ‘casco’. Na febrüari di e aña aki e akuerdo di hür a wòrdu firma ku Sebastopol B.V., e grupo ku lo eksplotá e museo. Durante e fase final di konstrukshon dor di kontratista Louis Dan B.V., lo kompletá e interior di e edifisio i e diseño di e kurá.
Banda di e museo, lo tin un restorant ku espasio pa un podio, un salon di siga, un galeria di arte/ sala di eksposishon i un sala di reunion. Den e museo lo tin un eksposishon interaktivo ku ta duna un bista general di e músika di Kòrsou durante e siglonan. Entre otro lo presenta instrumentonan tradishonal i partituranan original di e gran maestronan.
Monumentenzorg a kumpra e edifisio monumental aki, ku su dos fachadanan di tuit karakterístiko, na 2017. E kas tabata forma parti di un herensia ku no a wòrdu dividí i durante hopi aña e no a risibí mantenshon. Den e proseso di traspaso, 22 herederonan di Maria Helena da Costa Gomez tabata envolví. Na 2019, Monumentenzorg a kuminsá ku e restourashon ‘casco’ ku e meta pa stabilisá e edifisio i di evitá ku awa por drenta. E restourashon aki a kaba na 2020. E fase final di restourashon a wòrdu posponé pendiente e nesesidatnan di un futuro hürdó.
Na 2024, e partidonan a yega na un akuerdo, i na febrüari 2025 por a kuminsá ku e trabounan di e fase final aki. Sigun plan esaki lo ta kla na fin di 2025, despues di kua e por wòrdu mueblá i habri komo museo.
‘Huize Sebastopol’ ta un konstrukshon di medio siglo 18. E promé benta di e kas a tuma lugá na 1744. Den e akto di benta ta papia over di ‘’t Blauwe Huisje’ (e kas blou), situá na Consciëntiesteeg. Na su banda sur e tereno tabata yega te ku Rifwater. Medio siglo 18, gobernadó Isaac Faesch a biba einan. E nòmber ‘Hanchi di Warda’ pa Sebastopolstraat a originá di e kas di warda ku e temporada ei tabata situá serka di Faesch su kas. Un otro habitante notabel tabata Shon Wiwi, ku a biba einan medio siglo 19. E tabata un di e fundadornan di e klup ‘De Gezelligheid’ i di Banko Hipotekario di Kòrsou. Na prinsipio di siglo 20, e kas a bira propiedat di famia De Haseth i eventualmente di famia Da Costa Gomez.
Eks direktor Marcel Dennert ta satisfecho ku e la logra di sera un akuerdo ku Sebastopol B.V. pa e Museo di Músika, nèt promé ku su partida na Monumentenzorg na mart: “Ora mi a asumi kargo na 2015, mi predesesor George Schmit ya kaba a inisiá palabrashon ku e herederonan di Da Costa Gomez pa kumpra e kas. Ku mi por pone e proyekto aki den man di mi susesor ku un bista konkreto pa futuro ta duna mi un tremendo sintimentu di logro. Preservashon di e historia di e kas distinto aki tin hopi balor pa e generashon ku ta bin. I kon bunita ta, ku den su próksimo kapítulo e ta bai konta e narativa i hunga un ròl den preservashon di nos herensia musikal di Kòrsou.”
