Entrante promé di yanüari 2025 konforme desishon di minister di Hustisia e montante mensual di alimentashon ta oumentá ku 1.7%.
Tur yu ku no a kumpli 21 aña di edat tin derecho riba alimentashon. Si e yu ta bai skol e tin e derecho di alimentashon te 25 aña. E montante di alimentashon por keda stipulá pa medio di un desishon di Korte
(asina yamá “rechterlijke beschikking”) òf segun un akuerdo boluntario na ofisina di Justitiële Zorg (ántes Voogdijraad). Esaki ta bira e montante ku tur luna lo mester keda depositá pa mantenshon i kuido di e yu.
Konforme loke ta keda stipulá den artíkulo 402a, promé punto di buki unu di nos Kódigo Sivil, e montante di alimentashon ta keda legalmente oumentá ku un porsentahe (asina yamá indeksashon) kual ta fihá pa minister di Hustisia.
Den un dekreto ministerial (MB) fechá 21 novèmber di 2024, minister di Hustisia a stipulá e oumento di indeksashon ku 1.7%. Esaki ta nifiká ku e montante ku ta risibí òf ku ta paga pa luna na alimentashon lo oumentá entrante promé di yanüari 2025 ku 1.7%.
Si pa luna un persona ta paga òf risibí 100 florin na alimentashon, esaki ta bira 101.70 forin entrante promé di yanüari 2025.
