Den su esfuerso kontinuo pa prevení i kombatí trafikashon di hende, PATH a instalá un billboard informativo na Araratwijk. Minister di Hustisia, Shalten Hato, a ofisialmente desvelá e billboard den presensia di e tim di Path i representantenan di Konsulado General Merikano, un paso mas den e lucha kontra abusu I trafikashon di hende. E kampaña di konsientisashon ta sigui reforsá esfuersonan pa informá i protehá pueblo di Kòrsou.
Kiko ta PATH?
PATH (Prevenshon di Abusu i Trafikashon di Hende) ta un plataforma ku ta dediká na e prevenshon, detekshon i kombatí abusu i trafikashon di hende. Ta traha huntu ku partnernan lokal i internashonal, komo Polis, Ministerio Públiko, UOJZ, i organisashonnan di protekshon sosial pa mehorá e sistema di identifiká viktimanan i persigui malechornan.
Pa kiko un billboard?
E billboard instalá na Araratwijk ta sirbi komo un mensahe visual potente pa trese mas konsientisashon riba abusu di persona. Hopi víktima no ta konsiente ku nan ta den situashon di eksploitashon, òf no sa kon i unda por buska yudansa. Ku e billboard akí, pueblo lo haña informashon tokante abusu I trafikashon di hende i kontaktonan pa buska asistensia si mester.
Siguiendo e kampaña di konsientisashon
E billboard ta un mas entre hopi medidanan ku PATH ta tuma pa fortalesé e lucha kontra abusu i trafikashon di hende. Den futuro, PATH ta plania mas charlanan públiko, formashon pa profeshonalnan i kampañanan informativo pa sigui empoderá komunidat i laga hende rekonosé e menasánan di abusu I trafikashon di hende i e paso ku nan por tuma pa prevení.
Abusu i trafikashon di hende ta un krímen ku por afektá tur grupo den nos komunidat, i un hende informá ta un hende protehá. PATH ta konfiá ku edukashon i kolaborashon, nos por redusí e menasánan di abusu I trafikashon na Kòrsou.
Pa mas informashon, bishitá www.path.cw òf tuma kontakto via 692-1990 òf 679-7575.
