E pelíkula kòrtiku ‘Sunny’, na e idioma Papiamentu, dirigí pa Germán Gruber Jr., a wòrdu selekshoná pa e festival renombrá ‘Tribeca Film Festival’ na New York. E pelíkula, ku a hasi su estreno mundial den e ‘Curaçao International Film Festival’ (CIFF), lo tin su premièr internashonal dia 5 di yüni 2025, den e sekshon ‘Short Narrative’, ku tapeit korá i momentu ku prensa planifiká.
‘Sunny’ ta konta un historia tokante di e paso di hubentut pa adultes, tokante un hóben kitarista ku tin ku laga su bida na Kòrsou pa sigui su soño musikal. E pelíkula ta inspirá riba eksperensianan personal di Gruber mes, ku ta logra representá temanan universal manera despedida, kambio i nostalgia di un manera íntimo. “Ta pida di mi mes i di hende rondó di mi,” segun Gruber. “E ta tokante e transishon for di mucha pa adulto, i e realisashon dushi i marga ku nada lo keda mes kos pa semper.”
Gruber a reakshoná ku emoshon riba e selekshon: “Ta un gran honor ku ‘Sunny’ a wòrdu selekshoná pa un di e festivalnan mas prestigioso na mundu. Tribeca ta risibí vários mil aplikashon, i e hecho ku nos pelíkula kòrtiku, produsí na Kòrsou, ta den e selekshon, ta yena nos ku orguyo. Además, ta promé biaha ku lo mustra un pelíkula di Kòrsou na Tribeca. Mi ta spera ku ‘Sunny’ por mustra un públiko nobo kon fuerte i universal nos historianan por ta.”
E ròlnan prinsipal ta interpretá pa Thayzhean Aniseto i Sharlianne Beaumont, dos talento hóben di Kòrsou. E pelíkula a wòrdu skibí, dirigí i (ko-)produsí pa Germán Gruber Jr., den kolaborashon ku Ewoud Bon (sinematografía i produkshon), Sabine Veendendaal i Jeroen Beker (produkshon). ‘Sunny’ ta produsí dor di ‘Flinck Film’ i ‘Provider Films’, ku sosten finansiero di ‘Nederlands Filmfonds’, ‘Cultuurfonds Caribisch Gebied’ i ‘Curaçao Tourist Board’.
Mundu di pelíkula na Papiamentu ta sigui desaroyá.
Ku e selekshon di ‘Sunny’, industria di pelíkula na Papiamentu ta sigui pone su marka den esenario internashonal. Gruber, ku anteriormente a traha ‘The Legend of Buchi Fil’ i ‘Sensei Redenshon’, tin fé firme den e atrakshon internashonal di historianan ku ta bin for di e kultura úniko di nos islanan. “Nos no mester skonde ni kambia nos identidat,” Gruber a bisa. “Esaktamente ora ku nos ta konta nos mes historia, nos ta toka hende rònt mundu.”
‘Sunny’ ta un di e proyektonan selekshoná pa programa ‘Filmfonds Short’ 2024, ku ta enfoká riba sostené talento nobo den mundo di pelíkula.
