Premio Nicolaas “Cola” Debrot a keda otorgá na sr. Gregory Elias pa su trabounan meritorio ku e ta hasi den e ramo di músika pa pais Kòrsou. Minister di Enseñansa, Siensia, Kultura i Deporte (ESKD) sr. Sithree van Heydoorn den representashon di Gobièrnu di Kòrsou a hasi entrega di e boton ku ta un laraha di oro i Presidente di Konseho Kultural Kòrsou (KKK) sr. A. Pichardo a hasi entrega di e Sertifikado (Oorkonde). E premio di e montante di 5 mil Cg., riba petishon di Sr. Gregory Elias a keda entrega na Fundashon Birgen di Rosario komo un donashon pa e trabounan balioso i sumamente importante ku e fundashon ta hasi pa nos grandinan.
Premio Nicolaas “Cola” Debrot ta un premio riba tereno kultural ku for di 1968 Gobièrnu di Kòrsou ta otorgá anualmente na un persona òf organisashon ku a hasi trabounan meritorio. Kada aña un kategoria ta na turno pa risibí e premio. E kategorianan ta: arkitektura, arte visual, baile, folklor, literatura, músika, teatro i siensia. Konseho Kultural Kòrsou ta e órgano ku Gobièrnu a apuntá pa skohe ganadornan di premionan prestigioso manera Premio Cola Debrot i Premio Boeli van Leeuwen na baluartenan di nos pais. KKK na su turno ta forma un komishon di eksperto riba e materia partikular pa asina evaluá tur e diferente kandidatonan i presentá un ganador na Gobièrnu. E aña akí ta turno pa un persona ku hasi trabounan meritorio riba e área di Músika pa bin na remarke pa risibí e premio. E kuerpo hurado tabata konsistí di Sr. Hershel Rosario, Sr. Kevin Carty, Sr. Pernell Saturnino i sr. Andre Picardo.
E premio a keda otorgá na sr. Gregory Elias pa su trabou meritorio i komo muestra di rekonosementu na dje, pa e hecho di duna sosten kontínuo na talento kreativo, promoshon di edukashon i pa e manera ku e ta stimulá ekspreshon kultural na Kòrsou. Atraves di su organisashon, Fundashon Bon Intenshon, e a duna sosten na hopi proyekto ku ta promové músika i kultura di Kòrsou, ku un enfoke spesial riba hubentut. Bou di su liderato, Curaçao North Sea Jazz Festival a krese pa bira un plataforma internashonal importante ku ta stimulá desaroyo kultural i ekonómiko. Su dedikashon na desaroyo di talento ta kontribuí na engrandesé identidat kultural di Kòrsou, fortifiká bienestar di nos siudadanonan, desaroyo integral i promoshon internashonal di nos komunidat.
Sr. Elias pa medio di su Fundashon Bon Intenshon aparte di organisá Curaçao North Sea Jazz Festival, Blue Seas Festival, tambe ta organisá konsiertonan ku ta honra nos baluartenan musikal manera: Macario Prudencia, Doble R., Rudy Plaate, Chin Behilia, Mafalda Miguel, pa djis menshoná un par. Sr. Elias ta sòru pa un orkesta sinfóniko ku areglonan di maestronan lokal manera Randall Corsen i Dennis Aalse i mas. Nan ta toka e piesanan di e baluartenan akí pa asina músika di Kòrsou haña un realse internashonal.
Tambe sr. Elias ta pa dékadanan largu ta produsí artistanan tantu lokal komo internashonal. Banda di tur esaki, sr. Elias mes a yega di skibi i produsí músika. Semper sr. Elias ta yuda organisashonnan ku ta enbolbí ku músika manera Muziekschool Cultureel Centrum Curaçao, Curaçao Youth Orchestra i otro organisashonnan ku ta siña músika na nos hóbennan, patras di kortina, na un manera ketu i sin ningun benefisio. Esaki e ta hasi ku e vishon ku músika ta yuda kambia i edifiká un pais. E vishon di Fundashon Bon Intenshon ta komprometé su mes pa trese bienestar sosial na Korsou pa medio proyektonan di músika (tantu lokal komo internashonal), deporte i arte ku e mira pa desaroyo di nos hóbennan. Ku e vishon akí i dedikashon e ta pone medionan disponibel i tambe ta hasi esfuerso personal pa sigui engrandesé Kòrsou i su músika.
P’esei, Gobièrnu ta agradesido pa e aporte balioso di sr. Elias, spesialmente pa loke ta trata konservashon di nos músika úniko den Karibe. Na nòmber di Gobièrnu, Minister di ESKD sr. Sithree van Heydoorn a yama Konseho Kultural Kòrsou danki pa nan tremendo trabou. Tambe Minister a ekspresá gratitut na sr. Elias pa e hende ku e ta i pa su aporte balioso na nos pais den e ramo di músika.
