Programa IH&TM ta risibí evaluashon positivo
E programa International Tourism and Hospitality Management (IH&TM) di Universidat di Kòrsou Dr. Moises da Costa Gomez a selebrá un meta klave alkansá: el a pasa ku éksito e proseso di evaluashon intensivo di Nederlands-Vlaamse Accreditatieorganisatie (NVAO).
Na òktober 2024 un pènel eksterior a konfirmá ku e programa ta kumpli ku e standardnan internashonal di kalidat den área di evaluashon, eksaminashon i e nivel ku e graduado ta logra. E veredikto final tabata positivo, un prestashon ku ta suprayá e esfuersonan di e programa IH&TM pa logra ekselensia.
“Nos ta sumamente orguyoso di esaki, ku ta demostrá ku nos programa ta ofresé un fundamentu sólido pa e futuro profeshonalnan den sektor di turismo i hospitalidat. Ademas, nos ta orguyoso di e trabou di nos studiantenan, nan dedikashon i esfuerso ta kontribuí na e éksito di e programa,” segun Pamela Rusch, Program Director di IH&TM.
Studiantenan a bria ku un evento di “Pitch & Connect” eksitoso
Siman pasá studiantenan di terser aña di e programa IH&TM na Universidat di Kòrsou Dr. Moises da Costa Gomez a organisá ku éksito e di tres edishon di e evento anual di ‘Speednetworking Pitch & Connect’. E evento akí ta e punto kulminante di e kurso ‘Event Management’ i ta sirbi komo un plataforma pa konektá studiantenan ku empresanan den sektor di hospitalidat i turismo.
E evento, organisá kompletamente pa studiante, a reuní 14 empresa prominente di e industria ku studiantenan di promé i segundo aña. E talentonan hóben a presentá nan mes na potensial kompanianan, eksplorá oportunidatnan pa praktiká i fortifiká nan ret di kontakto profeshonal.
Entre e empresanan partisipante tabata tin nòmbernan renombrá manera CHATA, Sandals, Curaçao Marriott Beach Resort, Dreams Curaçao Resort, Mangrove Beach Corendon, Bali Curaçao i hopi otro. E evento a wòrdu balorá komo un konekshon eksitoso entre e mundu akadémiko i e industria.
“E evento akí a laga e talento i kreatividat di nos studiantenan resaltá. Ta un ehèmpel inspiradó di kolaborashon i inovashon,” segun Ayla Alders, dosente di IH&TM.
Kuríkulo renobá ta ofresé oportunidatnan di interkambio internashonal
Ademas, den e desaroyonan positivo di e programa IH&TM, tin e introdukshon di un kuríkulo renobá ku ta duna e studiante di terser aña un oportunidat pa hasi un interkambio. Durante e aña akadémiko akí, studiantenan lo pasa kuater luna studiando na paisnan manera Spaña, Hulanda i Bélgika. Esaki ta duna nan e chèns pa amplia nan konosementu i perspektiva i forma un ret internashonal.
Ku e tres, i mas, desaroyonan positivo akí, e programa IH&TM ta kontinuá profilá komo lider den formashon di e siguiente generashon di lidernan den e sektor di hospitalidat i turismo.
