Riba djaluna, 12 di mei 2025, Promé Minister Pisas i tambe Konseho di Minister a risibí Promé Minister di Hulanda Dick Schoof. E dia a kuminsá ku un konsulta bilateral entre Promé Minister Schoof i Promé Minister Pisas, siguí pa un enkuentro ku tur miembro di Konseho di Minister di Kòrsou.
Durante di e enkuentronan akí a trata diferente tema importante relashoná ku e kolaborashon entre Kòrsou i Hulanda.
Un di e puntonan di diskushon prinsipal ta e refinansiamentu di e fiansa di bono emití pa Hulanda. Minister di Finansa, Javier Silvania, a splika ku entretantu a entregá un petishon formal serka Sekretario di Estado pa Asuntunan Interior i Relashonnan den Reino, i ta pidi Promé Minister di Hulanda pa alabes pone atenshon riba e asuntu urgente akí.
Tambe a pone atenshon riba e intenshon di Kòrsou pa eliminá e eksigensia di visa pa personanan ku nashonalidat Dominikano, spesífikamente den kaso pa drenta Kòrsou. Konseho di Minister ya a tuma un desishon riba esaki. Ehekushon ta kana via Ministerio di Asuntunan Eksterior di Hulanda komo ku asuntunan di visa ta un instrumento di e maneho di asuntunan eksterior. Meta prinsipal ta pa fortalesé e lasonan turístiko, ekonómiko i kultural ku Repúblika Dominikano, sin ku esaki mester afektá e maneho en general ku ta konta pa henter Reino.
Ademas, Konseho di Minister a ekspresá su preokupashon riba e plan di Hulanda pa oumentá e impuesto riba buelonan di largo distansia. Segun Gobièrnu di Kòrsou, e medida akí por tin konsekuensianan negativo pa turismo, spesialmente pasó un proporshon signifikante di turista ta bini di Hulanda Oropeo.
Finalmente, a trata implementashon di sanshonnan internashonal basá riba e Lei di Sanshonnan Nashonal. Kòrsou a reafirmá su obligashon legal i boluntat pa implementá e sanshonnan di Nashonnan Uní i Union Oropeo, pero a suprayá e nesesidat pa ta konsiente di e realidatnan ekonómiko i geopolítiko di e isla.
Di parti di e delegashon hulandes tabata presente: Promé Minister Dick Schoof, Bart van Poelgeest (Sekretario General suplente di Ministerio di Asuntunan General), Roald Lapperre (Direktor general di Relashonnan den Reino), Saskia de Reuver (Representante interino di Hulanda na Aruba, Kòrsou i Sint Maarten), Anna Sophia Posthumus (direktor di e Rijksvoorlichtingsdienst – RVD) i Joris Groen (asesor di e Promé Minister). Bo Melchers, asesor polítiko serka Representashon di Hulanda na Willemstad, tambe tabata presente den e sala di reunion.
Di parti di Kòrsou, tur miembronan di e Konseho di Minister a partisipá na e reunion, huntu ku minister plenipotensiario Carlson Manuel, sekretario di Konseho di Minister Cherise Balentin, i presidente di e Komishon Nashonal di Reforma Caryl Monte. Sekretario General interino di Ministerio di Asuntunan General, Djurick Comenentia, i e sekretario adjunto interino di Konseho di Minister, Kristel Hooi, tambe tabata presente den e sala di reunion.
E bishita di trabou a tuma lugá den un ambiente habrí i respetuoso, suprayando e importansha di kolaborashon i kompenshon mutuo dentro di Reino.
