Promé Minister sr. Gilmar Pisas, e minister den Gabinete Pisas II ku ta polítikamente responsabel pa ehekushon di e Pakete di Pais, e asina yamá “Landspakket”.
Despues ku Promé Minister sr. Pisas i su konseheronan a negoshá ku sekretario di Estado Alexandra van Huffelen (D66) di Hulanda pa eliminá e proposishon di sekretario di estado Raymond Knops (CDA) pa bini ku COHO, e la negoshá na su lugá un areglo mutuo pa koperashon ku Hulanda, Aruba i Sint Maarten den e proyekto di mas aña pa reforma di sektor públiko. Esaki tabata un eksigensia di Hulanda despues di e pandemia di COVID, ya ku e tres islanan mester a fia basta plaka di Hulanda pa wanta nan kabes riba awa durante e pandemia.
Aña pasá e koalishon nobo di PVV, NSC, VVD i BBB a forma un gobièrnu nobo na Hulanda. E aktual Sekretario di Estado Zsolt Szabó (PVV) a deklará ku den e relashonnan di Hulanda pa ku Kòrsou, Aruba i Sint Maarten, e gobièrnu nobo di Hulanda lo ke realisá prinsipalmente 3 meta fiho via ehekushon di e Pakete di Pais. Esakinan ta: outosufisiensia ekonómiko, bon gobernashon i maneho finansiero sólido.
Outosufisiensia ekonómiko
Despues di kasi 4 aña di ehekushon eksitoso dor di Gabinete Pisas II di e reformanan den sektor públiko, manera palabrá ku Hulanda den e Pakete di Pais, djabièrnè último e aktual Sekretario di Estado pa asuntunan di Reino, señor Zsolt Szabó, a deklará públikamente ku Hulanda ta satisfecho ku e manera ku Gabinete Pisas II a ehekutá e reformanan na Kòrsou durante e periodo 2021-2025.
Esaki indudablemente ta kontribuí na e meta di outosufisiensia ekonómiko i a pone ku Gobièrnu di Hulanda a disidí di habri e areglo di garantia pa empresa chikí i mediano (B-MKB) pa kompanianan i imbershonistanan lokal tambe por haña garantia pa nan fiansanan komersial na bankonan lokal. Esaki, huntu ku e maneho di gobièrnu mes, lo duna un impulso grandi na kresementu ekonómiko di Kòrsou ku lo ta visibel kaba na aña 2026.
Bon gobernashon
Gabinete Pisas II a sa di kumpli kabalmente ku e reformanan, negoshando 14 agènda di reforma ku Hulanda durante 4 aña di gobernashon sin tuma ningun medida kontra e interes di pueblo di Kòrsou.
Aparte di e implementashon eksitoso di e Pakete di Pais durante e último 4 añanan, Promé Minister Pisas a enfoká na Gobièrnu Hulandes ku bon gobernashon ta parti di e vishon di Gabinete Pisas II pa un desaroyo sostenibel di Kòrsou. Konsekuentemente Kòrsou mes tin responsabilidat pa bon gobernashon i ku den e kuadro di nos leinan, Gobièrnu di Kòrsou lo hasi lo nesesario pa mantené bon gobernashon den tur ramo di sektor públiko.
Maneho finansiero sólido
Gobièrnu Hulandes i tambe Cft na vários okashon a konfirmá ku Gabinete Pisas II, bou di kordinashon di Minister di Finansa sr. Javier Silvania, a hiba un maneho finansiero sólido ku a drecha posishon finansiero di Kòrsou konsiderablemente, di tal manera ku esaki a resultá den un ‘surplus’ basta grandi den kaha di gobièrnu i riba nos presupuesto di mas aña.
Asta ora Hulanda a pone preshon pa resolvé e problemátika di ENNIA komo kondishon pa refinansiamentu di e fiansanan di temporada di COVID, Gabinete Pisas II a sa di resolvé e problema di ENNIA ku un struktura efektivo ku ta garantisá pago di penshun na 25.000 penshonado.
Komo konsekuensia di esaki Gabinete Pisas II a optené un refinansiamentu di e fiansanan di COVID di kasi 1 bion florin na un interes hopi abou di 2.9%, bahando asina e preshon di gastu di interes riba nos presupuesto konsiderablemente.
Tambe Gabinete Pisas II a hasi e reservashonnan nesesario riba presupuesto di Gobièrnu di Kòrsou pa kubri gastunan adishonal den sektor di salubridat. Tur esakinan ta parti di un maneho finansiero sostenibel. Ademas, dor di e reorganisashon di servisio di impuesto den kuadro di ehekushon di e Pakete di Pais i komo resultado un kobransa mas efektivo di impuesto e posishon di likides di gobièrnu ta bastante sólido. Na niun momento so Gabinete Pisas II no mester a akudí na Hulanda último añanan pa un un fiansa.
Esaki klaramente ta demostrá un grado haltu di un maneho finansiero sólido ku tambe ta kontribuí na outosufisiensia ekonómiko.
Orguyoso i gradesido
Mirando tur e resultadonan positivo aki durante e último 4 añanan riba tur e 3 terenonan ku Gobièrnu Hulandes a pone komo enfoke di e relashonnan den Reino, Promé Minister Pisas a haña ta oportuno pa, huntu ku presidente i miembronan di Komishon Nashonal di Reforma, i tambe e sekretarionan general i kordinadónan prinsipal di e ministerionan di Gobièrnu di Kòrsou, organisá un “get together” na kua okashon Promé Minister Pisas a gradisí e Komishon Nashonal di Reforma i tur e ministerionan enbolbí pa e hopi bon trabou ku nan a hasi den implementashon di e reformanan durante e último 4 añanan.
Promé Minister Pisas a deklará tambe ku no solamente e ta orguyoso, pero tambe gradesido pa e manera profeshonal, al kaso i efektivo ku e Komishon Nashonal di Reforma i tur e ministerionan enbolbí a atendé ku Hulanda den e ehekushon di e proyektonan importante pa futuro di Kòrsou den e Pakete di Pais.
Finalmente Promé Minister Pisas ta gradisí tur e (tres) gobièrnunan di Hulanda ku e la traha kuné durante e último 4 añanan i ku a sostené implementashon di e programa di reforma, tantu ku konosementu i e fondonan nesesario kaminda tabata tin mester.
Promé Minister Pisas ta apresiá tambe ku Sekretario di Estado señor Zsolt Szabó a primintí di sigui duna tur koperashon nesesario pa implementashon di e reformanan lo sigui ku éksito.
