Direktor di QMQ Organization, Ayanette Haard Statia ta kere ku tin momento ta nesesario pa hala atras i evaluá. Despues ku QMQ a tuma su tempu pa por hasi algun análisis profundo i evaluá detaye nan importante, a yega na e konklushon pa reorganisá pa sigui evolushoná, kaminda ta duna mas espasio na hóbennan pa sigui desaroyá. Kambio semper ta Bon Biní, prinsipalmente ora ta trata di kos nan importante. For di inisio, QMQ Organization a marka un stèmpel fuerte den nos komunidat, trahando i formando nos muchanan i hóbennan.
QMQ semper ofresé nos mucha nan i hóbennan preparashon riba nivel haltu, basá riba diferente aria, manera, lès nan di pasarela, public speaking, protokòl, etikèt i mas. Asina formando hóbennan bon prepará i sigur di nan mes.
E kambio prinsipal pa QMQ organization ta pa fortalesé e 3 pilanan ku tin i hasi nan mas fuerte; e promé pila ta QMQ Modelschool,kaminda ta forma modelonan for di 5 aña te ku 20 aña di edat brindando konosementu básiko i avansá riba tur e áreanan di preparashon. E di dos pila ku a bira esun mas popular último dos aña nan ta e sertámen; Miss Teenage Globe, kaminda e konsepto di preparashon di e partisipantenan ta ku un enfoke internashonal i e di tres pila ta e tòp frankisia nan Internashonal ku QMQ a skohe pa traha kuné, kaminda nos ganadornan di e sertámen ta haña un preparashon pa por bai representá Kòrsou internashonal.
Pa manehá e kambio di e tres pilanan di formashon ariba menshoná di un forma mas efisiente, QMQ ta presentá, ku kada pila di formashon den e organisashon lo tin nan propio Direktor pa por guia i kordiná.
Liyanne Hoevertz ta bira Direktor di e promé pila di formashon kual ta QMQ Modelschool. Liyanne Hoevertz tin mas ku 5 aña di formashon serka QMQ Modelschool mes i sa presis kon Ayanette ta gusta dirigí i pasa konosementu over na su hóbennan. Den pasado Liyanne a partisipá den sertámen di beyesa lokal. Danki na esaki, Liyanne a haña e oportunidat pa representá Kòrsou dos biaha den sertámennan internashonal, na kua e la sali promé finalista na México i a logra drenta den tòp 3 na Colombia. Pa algun tempu Liyanne huntu ku nos Miss Teenage Globe 2023 Amanda Verkerk ta guia i kordiná Modelschool QMQ huntu ku Ayanette. Awor ta momentu pa Liyanne pone den práktika tur loke e la siña durante e aña nan i sigui dirigí nos muchanan i hóbennan.
Edmee Haard Statia ta bira direktor di Miss Teenage Globe Curaçao. Edmee sigur no ta deskonosí den e mundu di Beyesa. Pa algun aña kaba Edmee ta kanando hopi serka di su ruman muhé Ayanette Haard Statia i a biba eksperensianan lokal i internashonal. Tambe Edmee a yega di partisipá den produkshon di sertámennan di nivel haltu den pasado. Mirando e eksperensia ku Edmee tin den e mundu di beyesa esaki sigur lo kontribuí na e reto nobo komo Direktor di Miss Teenage Globe Curaçao.
Ayanette Haard Statia no ta bai for di QMQ i lo sigui duna su sosten na e otro dos direktornan i hinter e tim di QMQ. Pa e reorganisashon Ayanette a skohe pa sigui enfoká su mes komo Direktor Internashonal i prepará nos hóbennan huntu ku un tim lokal i tambe internashonal pa sertámennan internashonal di nivel haltu. Un kambio mas interesante di QMQ ta ku Ayanette ta habri un espasio nobo kaminda hóbennan ku ya a yega di partisipá na sertámennan lokal di diferente organisashon por inskribí den un kurso nobo spesial pa hóbennan ku ke mas eksperensia i prepará pa por representá Kòrsou internashonal den futuro. Eksperensia lokal ta nesesario pa forma parti di e kurso aki.
Pa brinda e servisionan haltu ku QMQ ta kustumbrá kuné i awor ku tin mas enfoke i atenshon pa kada pila di formashon, QMQ a enkargá, komo parti di e kambionan, di brinda e servisionan den su propio espasio nobo ku tin tur loke ta nesesario pa sigui forma nos hóbennan. Sigui bo medio di komunikashon preferí paso pronto nos lo kompartí tur detaye ku pueblo di Kòrsou.
Pa tur informashon relashoná ku QMQ Organization, por sigui nos páginanan sosial, riba Facebook, Instagram i Tik Tok bou di e nòmber QMQ Organization. Tambe por manda un WhatsApp na +599 9 698-6063 òf mail na [email protected]
