Despues di 5.1 mion views i un sin fin di streams pa “Tukun”, RAFIK ta drenta studio na Medellin, Colombia pa graba otro piesa ku ta primintí di dominá e próksimo temporada. Durante di e último dianan RAFIK a hasi un ‘media tour’ na diferente siudat inkluyendo Baranquilla, Cartagena i Santa Marta promoviendo “Gracias Por Todo” (GPT). E artista yu di Kòrsou firmá pa KJ74 Entertainment ta kosechando bastante éksito den Latinoamérika (LATAM), esaki ta resultado di trabou duru i konsistente. “Gracias Por Todo”(GPT),un ‘reggaetón lento’ t’un komposishon di Rafik, Marval i Jayrozz, produsí pa Rene da Silva. Henter e tim ku a traha riba “GPT” ta un ‘potensia’, kuminsando na Rene da Silva ku ta un produktor Multi-Platinum i Nominado pa Latin Grammy, ku a kolaborá riba piesanan di e.o Prince Royce, Zion, i Lennox. Meskos ku Jayrozz, ku tambe a kolaborá ku e.o Peso Pluma, Bad Bunny, Yandel, Jay Wheeler i mas.
Reggaetón, awe ta un di e géneronan musikal mas popular na nivel mundial; e género musikal lider na paisnan di Karibe di abla spañó. RAFIK su progreso den merkado latino a hasi ku su siguimentu riba retnan sosial a oumentá notablemente; esaki outomátikamente ta keda tradusí den mas ‘views’ riba Youtube i invitashon internashonal, manera resientemente Fiesta del Carriel na Envigado. Tambe, su presensia riba ‘tapeit blou’ di Premios Monitor Latino, ku e aña aki a nominá e.o Feid i a konta ku presentashon di e.o Jey One, Alex Sensation i Joey Montana. Si tuma nota di e kresementu konsiderabel di RAFIK i añadí e promoshon ku e ta duna Kòrsou durante kada entrevista, por konkluí ku e fórmula di KJ74 Entertainment ta dunando fruta.
Ta importante pa Kòrsou sigui respaldá RAFIK i tur artista lokal riba tarima internashonal. Tur artista ku ‘pega’ internashonalmente ta konta ku sosten di nan pais natal. Na su turno, RAFIK ta bisa Kòrsou, Danki! “Gracias Por Todo” (GPT) ta papia di un relashon ku a terminá, pero asina mes ta keda gradisí p’e momentunan- ya ta konta ku kasi 1 mion views i por wòrdu skuchá na tur radio emisora lokal. Suskribí na kanal di Youtube KJ74 Entertainment i stream riba iTunes/ Spotify/ Tidal/ Apple Music.
