Refineria di Kòrsou (RdK) a firma un kontrato di lease históriko ku Oryx Midstream Private Ltd (Oryx Midstream) pa manehá i operá e fasilidatnan di Emmastad i e terminal di Bullenbaai na Kòrsou. E akuerdo di 30 aña a ser firmá pa sr. Patrick Newton, CEO, na nòmber di RdK, i sr. Ghanim M. Al Saad na nòmber di Oryx Midstream, miéntras ku Promé Minister di Kòrsou, sr. Gilmar Pisas, a para komo testigu di e echo aki.
Oryx Midstream ta prepará pa atraé invershonnan supstansial pa Latinoamérika i e region. Ku un eksperensia amplio den atkisishon di energia den sektornan petrolero i gas (upstream, midstream i downstream), i tambe den energia renovabel, Oryx Group ta un aktor stratégiko den e merkadonan prinsipal di krudo mundialmente.
E selekshon di Oryx Midstream ta konkluí un proseso integral inisiá pa RdK na yüni di aña anterior, ku a kuminsá ku un yamada di ekspreshon di interes. Di e 19 respondentenan, a pre-selekshoná shete na ougùstùs segun e informashon presentá. Despues di evaluashonnan profundo, Oryx Midstream a surgi komo e partner preferensial. A firma un Memorandum of understanding inisial (MoU), ku a permití tur dos banda pa hasi inspekshonnan tékniko i diligensia debí detayá. E Memorandum of Undestanding akí a pone e fundeshi pa e negoshashon eksitoso di e kontrato di lease di término largu.
E fase inisial di e kolaborashon akí lo enfoká riba e implementashon sigur i ekonomikamente prudente di e instalashonnan. Lo hasi evaluashonnan tékniko, ekonómiko i ambiental detayá pa evaluá e rumbo di e periodo operativo. E promé tres añanan lo kontené e inisio gradual di varios proseso i evaluashon integral, preparando e senario pa e plan operativo detayá di 30 aña.
E dos partidonan ta trahando awor pa kumpli ku e kondishonnan promé ku e akuerdo drenta na vigor dia 1 di desèmber 2024.
