Desaroyo di e trayekto di e programa di hidrógeno na Kòrsou ta alkansá un otro momentu importante. E trayekto di ehekushon di tantu e MoU(Memorandum of Understanding) komo e akuerdo firmá na 2024 a kuminsá haña forma konkreto.
Representantenan di Gobièrnu di Kòrsou i Hulanda, instituto di konosementu TNO i sektor privá, representantenan di tantu kompanianan di gobièrnu di Kòrsou komo organisashonnan di ramo di Hulanda a topa na Kòrsou entre 14 i 16 di aprel 2025. Durante e reunionnan intensivo aki, nan a evaluá e resultadonan di investigashon realisá den e último lunanan i a deliberá e siguiente pasonan stratégiko pa e programa.
Riba 15 di mei di 2023 gobièrnunan di Kòrsou i Hulanda a firma un MoU ku ta dirigí riba diferente teknologia di energia renovabel, manera entre otro: energia di bientu, hidrógeno bèrdè, energia solar i almasenahe di energia. A akordá entre otro interkambio di personal i konosementu sientífiko i tékniko, tambe lo a organisá grupo di trabou i proyektonan di investigashon konhuntamente. Práktikamente un (1) aña despues dia 15 mei 2023 e gobièrnunan a firma un asina yamá ‘Hoofdlijnenakkoord’ dia 24 mei 2024. E akuerdo aki ta referí spesífikamente na investigashon tokante produkshon di hidrógeno. Ku e akuerdo menshoná tin afspraknan konkreto relatá na e fase di demonstrashon i kon e programa pa realisá e programa en kuestion mester wòrdu realisá. Ademas e akuerdo ta trata posibilidatnan pa eksportá e hidrógeno.
Riba término largu, e programa lo mester garantisá energia duradero i kapasidat propio di produkshon energétiko pa pais Kòrsou. Esaki ta forma un base fuerte pa kontribushon di progreso sosial ekonómiko duradero di pais Kòrsou.
Através di e kadena di balor di hidrógeno aki, Kòrsou tin e potensial pa bira un di e lidernan di merkado komo produktor i eksportadó di hidrógeno bèrdè i su derivadonan. Esaki ku e meta final pa atkerí un ròl stratégiko komo un hub di hidrógeno stratégiko den Karibe i komo un posibel suministradó pa entre otro Hulanda.
Den e fase pre-kompetitivo aki, ta konta ku konosementu i ekspertisio vasto di ekspertonan di organisashonnan di ramo di Hulanda manera, entre otro, NMT-IRO i NLHydrogen. Ademas di esaki a delineá diferente senario di desaroyo ku ta sostené tantu gobièrnu di Kòrsou i Hulanda pa tuma desishonnan fundamentá ku bista riba un futuro serkano.
Siguiente paso
Lokual ku ta sigui ta realisashon di un “showcase” ku otro palabra fase di demonstrashon pa yega na un ‘business case’ mínimo i independiente di e kadena di balor di hidrógeno, ku tambe ta sirbi komo e base pa desaroyá e kadena di balor riba eskala mas grandi.
