E aña aki SKO (Sosiedat di Komersiantenan di Otrobanda), Kaya Kaya Movement i Amor pa Otrobanda den estrecho kolaborashon ta organisá Dia di Rei 2025 den Otrobanda. Otrobanda ta selebrá Dia di Rei den forma di Ban Topa Otrobanda. Lo tin un programa amplio i variá pa henter famia. Djasabra 26 di aprel lo transformá Otrobanda den un ambiente espektakular ku aktividat na Brionplein i den Kaya Grandi Otrobanda Breedestraat, bou di viadukto i e kayanan den besindario.
E programa di dia ta kuminsá for di 8’or di mainta ku e di 3 Merkado Amor pa Otrobanda ku benta di produkto, artíkulo, kuminda i bibida, Huki pa mucha i ambiente musikal i hopi mas. Pa 5’or di atardi ta inisiá e programa di anochi ku un variashon di presentashon musikal, baile i un ambiente festivo na diferente bar i restorant den Otrobanda.
Kaya Kaya e aña a kambia su aserkamentu di un festival pa un movementu ku aktividat i eventonan henter aña. Kaya Kaya Movement ta pone énfasis riba kultura, historia, kresementu ekonómiko i ta embolbí i empoderá komunidat i komersio di Otrobanda pa partisipá aktivo. Amor pa Otrobanda “District Branding Platform” lo pone mas atenshon na e bario i ta yuda promové aktividat, evento i kualke inisiativa di otro partidonan den bario di Otrobanda. Kaya Kaya Movement tin e plaser di por traha den estrecho koperashon ku SKO pa revitalisá Otrobanda i hasié mas atraktivo, agradabel i mas sigur pa asina tantu komunidat lokal komo turistanan por re-deskubrí Otrobanda su komersio, historia i kultura.
Keda pendiente pa mas informashon tokante e programa di Dia di Rei Ban Topa Den Otrobanda riba djasabra 26 di aprel próksimo. SKO, Kaya Kaya Movement, Amor pa Otrobanda ta invitá bo bin selebrá Dia di Rei mas grandi, briante i mas konektá den kaya di Otrobanda. Tin asina hopi kos great ta pasando den Otrobanda, p’esei bin re-deskubrí Otrobanda i Ban Topa Dia di Rei. Sigui nos riba nos páginanan sosial @kayakayafestival, @amorpaotrobanda i @sko.
