E team di PATH, liderá pa e Kordinadó Nashonal Said Hensen, ta orguyoso di anunsiá e nombramentu di sra. Rohera komo Raportadó Nashonal di Trafikashon di hende.
Entrante promé di mart 2025, sra. Rohera lo usa su ekspertisio pa fortifiká e lucha kontra trafikashon di hende na Kòrsou.
Sra. Rohera tin mas ku tres aña di eksperensia den e sektornan humanitario i di migrashon, kaminda el a manehá proyektonan enfoká riba protekshon, edukashon, salú i empoderashon ekonómiko. E tin un dòbel MSc den Polítika Públiko i Desaroyo Humano, ku un spesialisashon den estudionan di migrashon, di Universidat di Maastricht i UNU-MERIT. Adishonalmente, e tin un BA den Komunikashon i Estudionan Internashonal di Universidat di Sur Florida.
Den su funshon, Sra. Rohera tin un rol importante pa mehorá e koperashon i kordinashon entre partnernan komprometí ku e lucha kontra trafikashon di hende. E lo traha aktivamente ku stakeholders den region. Ademas e lo hasi investigá e magnitut di trafikashon di hende na Kòrsou, inisiá estudionan i evaluá esnan eksistente.
Tambe E lo kompartí data i análisis ku outoridatnan relevante pa mehorá e kolaborashon.
Otro tarea importante ta monitoria tendensianan den e data tokante trafikashon di hende na Kòrsou. Sra. Rohera lo identifiká informashon ku ainda nos tin mester di dje i mantené un base di dato sentral ku informashon di víktimanan, kasonan i inisiativanan pa garantisá e efektividat di e lucha.
Ku yegada di sra. Rohera e tim di PATH su kapasidat ta wòrdu fortifiká. Su eksperensia i dedikashon na e tópiko importante aki lo duna un kontribushon balioso na e metanan stratégiko di PATH i su partnernan.
PATH ta enfoká riba prevení i kombatí trafikashon di hende. Huntu ku su partnernan, PATH ta traha na konsientisashon, protekshon di viktimanan i persekushon di esnan kulpabel pa promové un komunidat seif.
