Shedimara Philips a keda honra ku e ‘Margaret Star’ djabièrnè último, durante di e di 22 Konferensia Anual di Liderazgo Femenino na Kòrsou, un premio ku ta selebrá individuonan hóben ambisioso ku vishon, determinashon i promesa pa futuro.
‘Margaret Star’ ta un premio di insentivo ku ta keda duná na un hóben di Karibe, di 18 pa 35 aña, sin importá su sekso.
E tin komo meta pa enkurashá i rekonosé ambishon, kuriosidat i dedikashon pa un futuro eksitoso. Komo parti di e honor aki, e ta haña un aña di mèntór ku un profeshonal di su eskoho.
Ku 33 aña di edat, Shedimara Philips ta un empresario motivá i ambisioso.
El a nase na Kòrsou, muda pa Hulanda ku seis aña, i a regresá ku 21 aña.
El a kuminsá na studia pa estetista pero su pashon pa eksperensia práktiko a hib’é na un programa di hospitalidat di “traha i siña”, kaminda ku el a refiná su abilidatnan den servisio, higiena, empresarial i finalmente liderazgo, te ku el a gradua komo gerente den horeca.
Na 2019, el a lanta su propio negoshi di bienestar, dediká na ofresé kuido profeshonal miéntras ku e ta empoderá otronan, partikularmente hóben i hende muhé.
Su kompromiso ta ku mèntòr na bista; un miembro di su tim anterior awor ta manehá su mes negoshi di masashi ku éksito, un testimonio di influensia di Shedimara.
Awe, e ta keda enfoká riba ekspanshon di su empresa, krea oportunidat di empleo i guia empresarionan aspirante den industria di bienestar. Su mishon ta pa yuda otronan transformá nan pashon den un profeshon, fomentando éksito den su komunidat.
Shedimara Philips a risibí e ‘Margaret Star’ pa su vishon, aserkamentu inovativo i impulso inkansabel pa éksito. Su liderazgo i mèntòr ta sigui inspirá siguiente generashon di empresarionan ambisioso, reforsando su ròl komo katalisadó pa kresementu i progreso na Kòrsou i mas leu.
Riba e potrèt: ganadó di e di 6 ‘Margaret Star’ Shedimara Philips i organisadó Reyna Joe
