Djaweps, 27 di mart 2025, e Tim di Maneho di Krísis di Kòrsou (CRBo) a hasi un tèst ku un sistema di alarma nashonal den kuadro di krísis i kalamidat. Den presensia di Promé Minister Gilmar Pisas, ku konforme lei ta responsabel pa preparashon i kombatí kalamidat, i huntu ku miembronan di CRBo a ehekutá e promé tèst ofisial den un sirkuito será i kontrolá na ofisina prinsipal di Digicel na Biesheuvel.
E Tim di Maneho di Krísis (CRBo) ta konsistí di 10 ‘Emergency Support Functions’ (ESF) ku ta konta ku representashon di diferente organisashon lokal. Durante aña tur e organisashonnan aki ta traha huntu i ta prepará pa den kaso di un krísis òf kalamidat por aktivá komo ESF i mitigá konsekuensianan di e krísis òf kalamidat. Direktorado di Kontròl di riesgo i Maneho pa kalamidat (DRR), den e Ministerio di Asuntunan General ta esun ku ta organisá i kordiná aktividatnan di CRBo durante aña.
Un sistema di alarma nashonal ta kai bou di responsabilidat di ‘ESF 2: Telekomunikashon’, representá pa Regular Authority of Curaçao (RAC). Koleganan di RAC, huntu ku ekspertonan di e.o. Digicel Curaçao i Digicel Group a bini ta traha pa un periodo largu riba e sistema akí yamá ‘cell broadcasting system’. E sistema ta brinda oportunidat pa manda un mensahe di alarma via telefòn pa tur persona ku ta den un área spesífiko òf si ta nesesario henter pais. E ‘cell broadcasting’ ta forma parti di sistemanan pa alarmá i alertá públuko ‘early warning system’ ku tambe otro paisnan tin manera ‘Presidential announcements’ na Merka òf ‘NL- alert’ na Hulanda.
Awe por bisa ku satisfakshon i orguyo, ku nos a dal un stap grandi i importante den e bon direkshon pa sigui protehá nos pais. Resultadonan di e tèst di awe ta krea base pa por sigui hasi e preparashonnan nesesario, traha riba e maneho i e kuadro legal pa por introdusí un sistema di alarma nashonal aki na Kòrsou. Sr. Julius Girigori ku ta CEO di Digicel Kòrsou, Aruba i Boneiru tambe tabata presente durante e tèst i a konfirmá Digicel su kompromiso ku nos pais i pa e motibu aki tambe nan ta e partner stratégiko den e proseso aki.
Ta importante pa enfatisá ku ta trata di un tèst ofisial, i na momento ku e Tim di Maneho di Krísis ta klá pa introdusí e sistema di forma ofisial, lo bini un kampaña di informashon i konsientisashon na komunidat kompleto. Komo pais ta importante pa nos ta bon prepará pa kualke situashon di krísis òf kalamidat ku por presentá.
Riba potrètnan por mira miembronan di CRBo, RAC i Digicel presente durante e demostrashon i tèst ofisial. Promé Minister Pisas tabatin honor di manda e promé mensahe di tèst pa e grupo presente.
