Ministerio di Enseñansa, Siensia, Kultura i Deporte (ESKD) a tene dos seshon di informashon pa sindikatonan relashoná ku entrega di material na personal di enseñansa. Tim di maneho i komishon di digitalisashon di enseñansa riba petishon di Minister di ESKD sr. Sithree van Heydoorn a duna informashon na sindikatonan relashoná ku e trayekto di digitalisashon di enseñansa: ‘TOPA MI RIBA E RUTA’.
Durante di e seshon akí tim di maneho i presidente di e komishon a presentá e ‘road map’ ku informashon aktualisá. Komo ku awor a yega na e momentu ku ta bai entregá un ‘device’ na personal di enseñansa. E parti di e trayekto aki tin komo nòmber: ‘TOPA MI … NA ENTREGA … PA KONEKTÁ. A enfoká riba e puntonan di atenshon ku ta: kiko ta bai pasa na entrega, seguridat, responsabilidat, privasidat, akuerdo i vários tema mas di importansia. Sindikatonan ku no por tabata tei presente tambe ta keda invitá pa un próksimo seshon di informativo.
E trayekto aki ta kanando huntu ku tur e 8 direktivanan di skolnan supsidiá ku ta forma parti integral di e trayekto. Huntu ku vários ‘stakeholders’ mas ministerio di ESKD ta den preparashon pa hasi entrega di e ‘device’ nan. Esaki ta kana di un manera strukturá i ordená pa tur personal di enseñansa ku ta traha na e 8 direktivanan di skol. P’esei ta na su lugá pa duna sindikato tur informashon komo ku nan ta den representashon di e personal.
Durante di luna di yüni ta kuminsá ku un kampaña intensivo di informashon i konsientisashon: TOPA MI … NA ENTREGA … PA KONEKTÁ, spesialmente dirigí pa nos personal di enseñansa. Tur maestro, dosente i e personal di sosten ta bai haña un ‘device’ ku ta bai fasilitá na trabou den enseñansa. E ‘device’ ta un instrumento ku gobièrnu ta fasilitá, pa un mihó preparashon di alumnonan den e mundu moderno di siglo 21.
Ministerio di ESKD por mira bèk riba dos seshon di informashon eksitoso i ta pidi tur hende pa keda pendiente pa sigui tur e kanalnan ofishal di gobièrnu pa mas informashon di e trayekto di digitalisashon di enseñansa.
