E buelo di TUI fly OR 365 a wòrdu risibí di un manera festivo awe tardi na Aeropuerto Internashonal di Kòrsou. Ku e buelo aki, TUI fly ta selebrá un logro spesial: e aña aki, e kompania di aviashon tin eksaktamente 20 aña ta bula entre Amsterdam i Kòrsou. Na yegada di e avion a tuma lugá un seremonia spesial. E Boeing 787 Dreamliner ku a wòrdu usá pa e buelo a wòrdu batisá i renobá di nòmber ofisialmente pa ‘Curaçao’ i for di awor padilanti e lo karga e nòmber di e destinashon aki, ku ta asina balioso pa TUI.
Arjan Kers, Direktor Gerente di TUI Hulanda i Bèlgika: “Kòrsou ta un di nos destinashonnan mas balorá pa dos dékada kaba. P’esei mi ta orguyoso ku awor un di nos Dreamliners lo karga e bunita nòmber aki. E ta un homenahe na e laso duradero ku nos komo TUI tin ku e isla. Ku e boutismo spesial aki, nos no ta solamente selebrando nos aniversario sino ta suprayá nos konekshon profundo ku Kòrsou.”
Resepshon festivo
E avion a wòrdu risibí na aeropuerto ku un seremonia festivo. Manera ta kustumber, e avion a wòrdu batisá pa selebridatnan lokal. Den e kaso aki nos Reina di Tumba Jefdany Manuela i tambe Dibo Doran: “Mi ta super orguyoso di por representá e famia di TUI i mi isla stimá, Kòrsou. Esaki ta un momentu históriko i ta mustra e importansia di e konekshon i historia entre TUI i Kòrsou! Ademas di Jefdany Manuela i Dibo Doran; Promé Minister Pisas, Minister Cooper (Tráfiko, Transporte i Planifikashon Urbano/ Interim Desaroyo Ekonómiko) Muryad de Bruin (Direktor Curaçao Tourism Board), Anuschka Cova (CEO CHATA), Peggy Croes (Senior Vice President Aviation Market Development) i otro invitadonan tambe tabata presente na e seremonia.
Promé Minister Pisas: “Pa Kòrsou, aviashon no ta djis un sektor, e ta un liña di bida esensial. Danki na entre otro esfuersonan kontinuo di TUI, nos turismo a krese, nos visibilidat internashonal a oumentá, i nos komo pais a sa di benefisiá strukturalmente di e kantidat stabil di bishitante for di Oropa. Mi ta gradisí TUI pa nan kontribushon na e progreso di nos isla, danki pa konstruí nos brùg, literalmente i figurativamente, i mas ku tur kos: danki pa 20 aña di konfiansa.”
Muryad de Bruin, Direktor Curaçao Tourism Board: “E impakto ekonómiko di 20 aña di TUI Fly riba turismo di Kòrsou ta signifikante. E akseso konsistente na e isla no solamente a kontribuí na kresementu di nos sektor turístiko, pero tambe na desaroyo di talento lokal i progreso ekonómiko duradero. Kada aterisahe na Kòrsou ta trese no solamente bishitantenan, pero tambe famia i amigunan mas serka di otro”.
20 aña di konekshon
Desde su lansamentu na 2005 – e tempu ei konosí komo ArkeFly – TUI a krese i bira un balor agregá permanente riba e isla. A kuminsá ku un ofisina chikitu ku seis agente di benta na aeropuerto i dos buelo pa Kòrsou pa siman. Awendia, no solamente Willemstad ta kas di un ofisina prinsipal moderno ku ta akomodá alrededor di 150 empleado lokal, e kompania di aviashon awor tambe ta bula dos biaha pa dia den siman entre Kòrsou i Amsterdam. Esaki ta hasi ku no solamente e ta trese míles di bishitante pa Kòrsou tur aña, sino tambe ta uni famia i amigunan pa eventonan importante den bida pa 20 aña kaba.
Mei ta un luna festivo
Henter luna di mei ta dediká na ‘20 aña di TUI & Curaçao’. Por ehèmpel, un página spesial riba e wèpsait di TUI ta konta ku historianan bunita i konmovedor di kliente i empleadonan ku tin bunita rekuerdo durante 20 aña di buelonan ku TUI fly entre Kòrsou i Amsterdam. Dibo Doran, huntu ku diferente trahadó di TUI, a graba un momentu festivo riba video pa konmemorá 20 aña di TUI na Kòrsou. Tambe a lansa un kompetensia den kual partisipantenan tin chèns di gana un biahe maravioso. Pasobra den e tiendanan di TUI bo no ta solamente kumpra pasashi, pero tambe reservá biahenan pe destinashonnan di mas bunita.
Boeing 787 Dreamliner
E buelonan di TUI pa i for di Kòrsou, meskos ku e otro buelonan di distansia largu, ta wòrdu operá ku un Boeing 787-8 Dreamliner. E predesesor Arke Fly tabata e promé aerolínea Ulandes ku a bula ku e tipo di avionnan aki. E skohensia di e Dreamliner tabata den liña ku e strategia pa ofresé pasaheronan mas komodidat i na mes momentu operá mas sostenibel danki na e ménos konsumo di kombustibel di e tipo di avionnan aki. Entretantu e flota di TUI fly Hulanda ta konsistí di sinku Boeing 787-8 Dreamliners i seis avion Boeing 737 MAX. Esaki ta duna TUI un flota moderno ku avionnan ku ta produsí signifikantemente ménos zonido i ta mas ekonómiko.
