Den e último lunanan, a hasi hopi trabou riba e edifisio di TUI na Schottegatweg. No solamente a traha un piso èkstra, sino ku e agensia di biahe na e piso abou tambe a pasa den un metamorfósis. Den fin di siman último a duna atenshon festivo na esaki. E tienda renobá a keda habrí ofisialmente den presensia di alrededor di 100 invitado, inkluyendo Promé Minister di Kòrsou sr. Gilmar Pisas i sr. Charles Cooper, Minister di Tráfiko, Transporte & Planifikashon Espasial i Minister interino di Desaroyo Ekonómiko. Públiko presente tambe por a bishitá e piso nobo.
Antoin Klein Hofmeijer, Hefe di TUI Dutch Caribbean a bisa, “Nos ta orguyoso di e bunita ekspanshon di nos edifisio i ofisina. Nos ta sigui krese komo dunadó di trabou lokal tambe, aktualmente nos tin 155 empleado, pues e ekspanshon tabata altamente nesesario pa por akomodá tur nos koleganan. E piso nobo i e ‘re-style’ di e agensia di biahe ta enfatisá e importansia ku nos ta duna na un ambiente di trabou agradabel pa nos empleadonan i ku e bunita diseño nobo di e tienda, nos por ofresé nos klientenan aún mas servisio i inspirá nan mihó ainda ku nos surtido versátil.”
Durabilidat
Ku e konstrukshon aki, e edifisio/ofisina di TUI awor tin un total di 99 lugá di trabou. Ademas, a lanta un sala di entrenamentu p’asina e organisashonnan di biahe por sigui invertí den desaroyo di nan empleadonan. Meskos ku e konstrukshon di e edifisio, a tene kuenta ku sostenibilidat ora di konstruí e piso èkstra. Por ehèmpel, e pènelnan di glas ku ta wòrdu usá ta kontené glas isolante, tin plachinan di glas èkstra diki i ta resistente na solo ku esaki por limitá uso di èrko. E piso nobo tambe ta risibí hopi klaridat, loke ta nifiká ku ménos lus artifisial ta nesesario. Naturalmente e 164 pènelnan solar a wòrdu poné bek riba dak. Esakinan ta proveé un gran parti di e energia nesesario.
Pasashi di avion i biahenan di fakansi
Ademas di bende pasashi, TUI tin un rango amplio di biahenan di fakansi. E diseño nobo di e agensia di biahe ta enfoká mas riba esaki i ta ofresé espasio pa inspirá i informá klientenan den trankilidat tokante e gama amplio aki. Pa selebrá e ‘re-style’ di e agensia di biahe, lo tin promoshonnan dibertido pa klientenan den e siman benidero. Un i tur ta keda kordialmente invitá pa bin tira un bista na e tienda nobo.
