Durante un seremonia formal/ofisial rondó di Dies Natalis (fecha natal/di fundashon di universidat) dr. Stella van Rijn a keda instalá komo Rector Magnificus di Universidat di Kòrsou Dr. Moises da Costa Gomez. Na e okashon ei el a skèts e direkshon den kua e ke bai ku universidat den e añanan benidero, rumbo pa 50 aña di eksistensia di e universidat den 2029.
Universidat di Kòrsou lo bai traha mas estrecho ku anteriormente ku diverso sektornan i gruponan di profeshonal pa ofresé konekshon ku loke ta nan nesesidatnan. Tambe e universidat ta para habrí pa koperashon ku otro institutonan di enseñansa riba e isla. “E importansia di un populashon profeshonal bon prepará ta muchu grandi pa pensa solamente den términonan di kompetensia. Ku sinkronisashon i koperashon nos por yega na un bon ofresimentu total di enseñansa superior ku ta pas ku e eksigensianan di e merkado laboral.”
Van Rijn lo wak tambe ki ròl i koperashon ta posibel ku e kantidat di graduadonan ku a studia na UoC òf UNA (Universidat Nashonal di Antia). “Tur kaminda riba nos isla i pafó bo ta topa ku studiantenan anterior ku tin bon posishon i ku ta orguyoso di e universidat, pero te ku awor nos no tin lasonan mas ku nan. Esaki mi ke mira otro. Mi ta ripará serka e graduadonan ku nan mes tin interes pa esaki.”
Van Rijn ta posishoná e universidat komo katalisador pa un desaroyo duradero di Kòrsou. Ya ku e universidat ta prepará nivel medio i superior. Anto e nivelnan ei mester ta bon prepará pa loke ta konosementeu, abilidatnan i aktitut pa enfrentá e retonan kompliká ku nos komunidat tin su dilanti. Van Rijn: “Nos mester tene kuenta ku ningun persona den práktika tin sufisiente na solamente konosementu riba su mes tereno dor di e kambionan rápido ku ta tuma lugá. UoC ta bai prepará studiantenan mas amplio i integral pa asina nan, tambe pa loke ta trata desaroyo duradero, ta haña e ekipahe adekuado. Esaki ta hasie mas interesante pa nan mes i pa nan futuro doñonan di trabou.”
E transishonnan impaktante ku nos ta (bai) eksperensiá na Kòrsou lo pone eksigensianan pa e asina yamá ‘soft skills’. E universidat lo fokes enfátikamente riba formashon di studiantenan enkuanto abilidatnan (inter)personal, aktitut i mindset. UoC ke ofresé tipo di opshonnan akí tambe na esnan ku ya ta trahando.
Dr. Francis de Lanoy a pasa e rektorado djaluna anochi pa dr. Stella van Rijn dor di entregá e martin di presidente. El a pronunsiá un palabra di gradisimentu i a wak bèk riba su tres términonan komo Rector Magnificus.
