E di 19 edishon di Ride, Swim, Walk & Run for the Roses e fin di siman aki a fortifiká su reputashon di ta e evento mas masal na nos isla, esei pa un bon kousa pa komunidat sin meta di hasi ganashi pa e organisashon mes. Despues ku ya djabièrnè hopi flanèl di diferente tamaño a kaba, riba djasabra a sobra solamente algun flanèl pa mucha i ehemplar di XL den benta. I nan tambe a kaba promé ku ora! Mas ku klaro ku fundashon Ride for the Roses Curaçao (RFTRC) ta kontentu atrobe.
Miéntras e organisashon di antemano a tene kuenta ku un kresementu di 20% kompará ku 2024, for di poblashon a reakshoná di forma sorprendente di moda ku por a registrá un kresementu di 40%. A base di esaki ta premirá pa otro aña na e di-4 lustro mas ku 10.000 persona lo bai partisipá na e diferente elementonan di e evento aki. Esei lo ta èkstra interesante pasobra e aña aki un kantidat kresiente di turista i otro bishitante temporal (stazjèr, expats, etc.) a partisipá na e evento.
Ku esaki den fondo direktiva di e fundashon RFTRC por wak bèk ku satisfakshon riba e edishon aki di Walk, Run, Swim & Ride for the Roses. Un danki grandi ta na su lugá pa e míles di partisipante na e diferente aktividatnan (kore, kana, landa i kore baiskel). Ku sosten di e patrosinadornan aserka, e aktividatnan aki a generá na total mas ku 400.000 florin na fondo pa e bon kousa, esta e sosten na esnan ku ta luchando kontra kanser.
Despues di e edishon di 2024 a resultá for di un enkuesta kiko e deseonan di e partisipantenan ta. A base di esei, por ehèmpel, a introdusí un servisio di konvoi, for di mitar di 6 mardugá te mitar di 11 entre Mambo Beach i Wilhelminaplein. Ya e promé biaha aki a hasi bon uso di esaki. Loke tabata un estorbo ta ku outomobilista a bai stashoná nan vehíkulo na e sitio ku tabata marká pa e konvoinan para, di moda ku nan haña nan den pèrtá. Nobo tabata tambe ku na Awasá por a kumpra un kòpi kòfi. Tambe tabatin introdukshon di e token, un moneda di metal ku e emblema di e Rosa riba dje, remplasando e rosa físiko. E token-nan tabata hopi gustá, te hasta algun partisipante a bai tuma mas ku un i despues e organisashon a kai chikí. Esnan ku no a haña por mèldu esaki atraves di [email protected] di moda ku por wak si ta buta un enkargo mas pa entregá mas despues. Sin mas e token a kai na agrado; ta djis algun a kòrda bèk ku nostalgia riba e rosa di promé, pero nan a komprendé pakiko e fundashon bai den direkshon di durabilidat.
Churandy Martina
Pa motibu di un palu di awaseru nèt promé ku 7 or, e warming-up na Awasá pa prepará pa e Walk & Run for the Roses a kuminsá poko atrasá. Despues di palabranan di e patrosinador prinsipal Orco Bank, fondo Prinsesa Wilhelmina (PWF) i e fundashon Ride for the Roses tabata na Kòrsou su heroë deportivo Churandy Martina algu despues di 7 or pa duna e señal ofisial di salida pa e novedat Run for the Roses ku a hinka den otro den koperashon ku Curaçaose Atletiek Bond (CAB). Sinku minüt despues e kanadónan a sali, ku e motornan di Wild Hogs nan dilanti. Tantu pa e Walk komo e Run por a skohe pa e ruta di 5km pasando riba brùg Emma òf esun di 8km pasando riba brùg Juliana, tur dos pa bai Mambo BLVD. E último ruta aki e aña aki pa promé biaha a lora na Skalo pa pasa dilanti e ofisina di PWF ku ta un sitio hopi importante komo respaldo pa asina tantu pashènt di kanser i esnan yegá na nan. Por lo demas, Churandy Martina a partisipá na e kareda di 5km.
E tres elementonan di Ride for the Roses a kana zetá. Miéntras ku e koredó i kanadónan tabata drenta ainda, e koredónan di baiskel a sali pa e diferente distansianan. Promé Easy Ride di 10km pa Punda i bèk. Despues esun di 40km, siguí pa esun di 60km. Nan tur tres a kuminsá i kaba na Mambo BLVD. E mainta ei na Madero tabatij na sierto ora tambe seshonnan Xtra di Blue Maxx Health Club pa hasi i tene e kurpa ágil; riba esaki tambe a reakshoná ku entusiasmo.
Swim
Alguitu despues di 12 or di mèrdia na Zanzibar/Jan Thiel a landadónan a sali. Aki tabata e kordinador di landamentu Kevin Virginie i presidente di RFTRC Benno van Leeuwen ku a duna e señal di salida, ku CPS komo gran patrosinador di Swim for the Roses. Aki tambe pa esnan ku a drenta komo e promé tresnan na Wet & Wild a risibí un premio. DJ Boogieman i John Anthony a entretené e públiko aki.
Ban pa 2026
Banda di tur e partisipantenan na e evento, direktiva di RFTRC ta gradisidu na e mas ku 200 voluntarionan, polis (KPC), Krus Kòrá, Wild Hogs, VKC, Ministerio di Defensa, Citro, Wardakosta, e botonan ku a tene bista i hopi mas kolaborador pa nan kontribushon valioso i ta konta ku nan atrobe na 2026! Pa loke ta e patronisadornan e gratitut ta bai, banda di e spònser prinsipal Orco Bank, na tur esnan grandi i chikí – di mas pa menshoná tur pero ta gradisí nan di forma separá.
