Tabata djárason dia 21 di mei último ku e evento anual ‘Best of the Best Annual Awards Ceremony’ a tuma lugá den Ballroom di Renaissance Wind Creek Resort. Tabata un anochi di emoshon, rekonosementu i inspirashon. Gerente General di Wind Creek Curaçao, sra. Averilette Francis a habri e anochi elaborando riba e momentu spesial i e sentimentu di orguyo inmenso di por wòrdu nombrá komo un finalista pa ‘Best of The Best’ – no a base di kiko bo ta hasi sino a base di kon bo ta hasié, ku konsistensia, kuido i kurashi.
Maestro di seremonia pa e anochi tabata Sra. Maylin Trenidad, VP Caribbean Consulting kende, a presentá tur e nominadonan pa e ‘Best of The Best 2024’. Presentashon di e nominadonan a bai kompañá ku un video impreshonante. Sr. Angelo Martes, Direktor di Rekurso Humano, den su presentashon a elaborá riba kon e implementashon di e Best the Best pa Wind Creek Curaçao a wòrdu anunsiá na aña 2023 dor di e Executive VP di Rekurso Humano, sra. Catherine Timmons i e impakto positivo riba e team. Tambe ku lokual tur nominado tin den komun ta ku nan ta kumpli ku nan tarea di kurason. Durante dje evento di gala, a anunsiá e dos ganadónan pa aña 2024; un pa kategoria di Miembronan di Tim (Team Members) i un den kategoria di Liderazgo (Leadership). E kompetensia pa e premio anual a konsistí di 17 nominado ekselente. E dos ganadónan kada unu a risibí un premio neto remarkabel di US$ 10.000, huntu ku un vakashon “all inclusive” pa 2 persona na kualkier propiedat di Wind Creek Hospitality i benefisionan adishonal. Tur nominado a wòrdu rekonosé pa nan dedikashon i prestashon sobresaliente durante henter aña. Kada kolega ganadó a sobresalí na nan manera, kontribuyendo na éksito kontinuo di Wind Creek Curaçao.
Den kategoria Miembronan di Tim (Team Members), tabata Jessica Adoptie, Payroll Master, ku a gana i den kategoria Liderazgo (Leadership) tabata Hainer Marin, Supervisor Engineering. E evento a konta ku presensia di ehekutivonan di Wind Creek Hospitality; Sr. Jay Dorris Presidente & CEO, Sr. Arthur Mothershed, VP Ehekutivo di Desaroyo di Negoshi & Relashonnan ku Gobièrnu i Catherine Timmons, VP Ehekutivo di Rekursonan Humano. Esaki ta suprayá e importansia di e evento aki pa Wind Creek Hospitality. Nan bishita na Kòrsou ta enfatisá e kompromiso di e kompania pa rekonosé i sostené kada miembro di e tim.
E Presidente i CEO di Wind Creek Hospitality, Sr. Jay Doris a sera e evento bisando “Miéntras nos ta rekonosé e ganadónan anual di ‘Best of the Best’, mi ke gradisí kada un di boso pa boso kompromiso i sosten den e kresementu i éksito kontinuo di Wind Creek Curaçao. Nos base pa rekonosé miembronan di tim sobresaliente ta basa riba e balornan esensial di Wind Creek Hospitality”. Durante nan bishita, e ehekutivonan di Wind Creek Hospitality a probechá tambe di e oportunidat pa konektá ku miembronan di tim, supervisornan, gerentenan, i e tim ehekutivo. Esaki tabata un momentu den kual hopi konosementu balioso, enkurashamentu i apresio a wòrdu kompartí ku e tim i tambe reforsá e laso entre e ehekutivonan di Wind Creek Hospitality i e tim lokal di Wind Creek Curaçao. “Pabien na tur e ganadónan! Boso logronan ta inspirá nos tur. Nos ta enkurashá kada miembro di e tim pa sigui traha pa ekselensia i pa sigui inspirá esnan rònt di bo pa ta É Mihó”.
