Djasabra 8 di Mart paisnan i organisashonnan rònt mundu a selebrá Dia Internashonal di Hende Muhé. Esei tabata e kaso na nos islanan tambe. WoMen Steering Committee Curaçao (WSCC), komo e organisashon ku pa último 50 aña a sali na vanguardia di e hende muhé, tambe a selebrá e dia aki en grande. Den oranan di mainta direktiva di WSCC i representantenan di e organisashonnan afiliá, a bin huntu durante di un Santu Sakrifisio di Misa ku a tuma lugá na Misa Maria Auxiliadora, na Santa Maria. Komo invitado spesial tabata presente Minister pa Desaroyo Sosial, Labor i Bienestar, sra. Dayanara Chin-A-Lin – Roozendal, i alabes parlamentarionan sra. Giselle McWilliam, sra. Corinne Djaoen-Genaro i tambe eks-minister di Finansa, sr. Kenneth Gijsbertha. Alabes tabata presente un delegashon di Aruba Women’s Club, komo invitadonan spesial di WSCC.
E misa a ser presidí pa pastor Ivan, a tira lus riba importansia di kada hende muhé pa su famia, su trabou, organisashonnan na kua e ta afiliá, i komunidat en general . Na final di e parti ofisial di misa presidente di WSCC, sra. Mirieta Lourens-de Lanoy, tambe a dirigí algun palabra na esnan presente. Sra. Lourens, na nòmber di e direktiva di WSCC a ekspresá gratitut pa e bendishonnan risibí i alabes a yama danki na kada persona i organisashon pa nan trabou balioso realisá durante di 50 aña pa adelanto i bienestar di e hende muhé.
Alabes e presidente di di WSCC a para ketu na e yamada di Nashonnan Uní , a base di e lema ku U.N. a skohe pa aña 2025, pa Aselerá Akshon. “Nos no mester laga esaki na djis un lema, pero mester wak kada un den nos seno, komo organisashon i komo individuo, kiko por hasi pa Aselerá Akshon. “Nos sa ku hopi biaha nos tin bon idea, ta reuní, diskutí i plania, pero ora yega momentu di tuma akshon esaki no ta ku e diligensia rekerí pa mira e resultadonan deseá. Pa loke ta trata trato hustu i oportunidatnan real pa e ser femenino por progresá nos a logra basta último añanan, pero nos tur ta konsiente ku ainda tin un kaminda pa kana. Mester duna kontenido real na mas inklusividat di hende muhé den un sentido amplio. Mester krea posibilidat pa kada hende muhé, i awor tambe e hòmber, pa e por desaroyá su talento i konosementu i alkansá e máksimo di su potensial. Esaki ta benefisiá, no solamente su mes, pero tambe su famia, ku ta núkleo di nos komunidat. Tin basta trabou pa hasi. Ban realmente aselerá akshon,” Sra. Lourens-de Lanoy a bisa.
Pa den oranan di anochi WSCC a reuní ku su invitadonan na un sena pa konmemora e 50 ana nan di WSCC i selebrá dia internashonal di hende muhé na Dreams Hotel and Resort. Den e programa di e anochi a resaltá un diskurso realisá pa presidente di WSCC, sra. Lourens-de Lanoy i alabes presentashon di un dokumento skirbí pa Dr. Maria Liberia-Peters, ko-fundadó di WSCC. Kontenido di e dokumento, ‘Tabata nesesario lanta Steering Committee?’, a ser redaktá sekretario di direktiva di WSCC, sra. Jennifer Hypolite, komo ku Dr. Liberia – Peters mester a biaha pa Hulanda pa akudí na diferente invitashon ku el a risibí di gobièrnu i organisashonnan na Hulanda.
Orador spesial pa e anochi tabata sra. Clarelli Hato-Willems, Den su diskurso, informativo i konmovedor, sra. Hato-Willems a para ketu na susesonan históriko den e lucha pa trato hustu di e hende muhé, i e trayekto pa kibra ku barera di desigualdat den e mas amplio sentido di palabra. “Den transkurso di último añanan a logra bastante, tantu na nivel lokal, komo internashonal, pero ainda tin un kaminda largu pa kana i mester kibra barera i aselerá akshon,” Dr. Hato-Willems a bisa.
Un parti importante riba programa di e anochi tabata Steering Award. Organisashon nan afilia a manda nuebe nominado pa ku e Steering Award. Kada un di e organisashonnan aki, por a proponé un persona ku a base di prestashon ehemplar a ekselentá i a hasi impakto den bida di otronan. Un kuerpo di hurado, a nominá pa Steering Award, a base di trabou balioso ku e organisashonnan aki a bin ta hasi pa bienestar i progreso di e hende muhé, i nos komunidat en general. E personanan proponé pa nan organisashonnan ta: Elvia Jamanika – Grupo Trinitaria, Hildegardo Hous – Damas den Union, Kelly Gerard – Muhenan Nashonalista, Mereline Lourens – Asosashon Nos Plaser, Renalda Weigle – Ladies Be Blessed, Rutlin Sophia – Recordar Es Vivir, Zaira Inees – Ordafla, Nilca Fransisca – Ordako, Josepha Leverock – Ebenezer women Club. E Steering Award pa aña 2025 a ser otorgá na sra. Nilca Fransisca – Ordako.
Presentenan por a disfrutá di un sukulento sena, ku animashon musikal di Grupo Ekis i oportunidat pa sosialisá. Na final di e anochi tabatin presentashon kultural di grupo di baile Kreadansa i deklamashon di algun poesia na enkargo di sr. Hensley Koeiman. Alabes a otorgá sertifikadonan di apresio na representantenan di Women’s Club Aruba ku tabata invitadonan spesial di WSCC durante di e fin di siman.
Sra. Lourens-de Lanoy, na final di e anochi a gradesí tur persona i organisashon ku a hasi posibel realisashon di e dos eventonan.
